Kókshetaýdaǵy 5510 áskerı bólimsheniń 40-tan astam áskerı qyzmetshisi JRVI (jedel respıratorly vırýsty ınfeksıa) belgilerimen juqpaly aýrýlar ortalyǵyna jatqyzyldy, dep habarlady QazAqparat.

Olarmen baılanysta bolǵan 5 adamnan mınıngoktyq ınfeksıa, 4 enterovırýstyq ınfeksıa anyqtaldy. Bul týraly Aqmola oblystyq sanıtarıalyq – epıdemıologıalyq baqylaý departamenti basshysynyń orynbasary Serik Omarhanov málim etti.

Departament basshysy orynbasarynyń aıtýynsha, qazirgi kezde naýqastardy jáne olarmen baılanysta bolǵan adamdardy labarotorıalyq zertteý sharalary jalǵasýda.

«Bıylǵy jyldyń 23 tamyzynda Aqmola oblystyq sanıtarıalyq – epıdemıologıalyq baqylaý departamentine Aqmola oblystyq densaýlyq saqtaý basqarmasynan Kókshetaý qalalyq kópbeıindi aýrýhanasyna oblys ortalyǵy aýmaǵynda ornalasqan 5510 áskerı bólimshesinen sarbazdardyń JRVI (jedel respıratorly vırýsty ınfeksıa) belgilerimen áskerı qyzmetshilerdiń jetkizilgendigi týraly aqparat tústi. Búgingi tańda juqpaly aýrýlary ortalyǵyna 40-tan astam áskerı qyzmetshi jatqyzyldy, olardyń jaǵdaıy ortasha, keıbiriniń jaǵdaıy qanaǵattarlyq. Birlesip júrgiziligen epıdemıaǵa qarsy sharalardyń nátıjesinde naýqastarmen baılanysta bolǵan 278 adam anyqtaldy, olardyń barlyǵynda JRVI belgileri baıqaldy. Labarotorıalyq zertteý barysynda 5 adamnan mınıngoktyq ınfeksıa, 4 enterovırýstyq ınfeksıa anyqtaldy. Barlyǵynda koronavırýstyq ınfeksıa tabylmady. Baılanysta bolǵan barlyq 278 adamnyń zertteý analızderi jumys ústinde», - dedi Aqmola oblystyq sanıtarıalyq – epıdemıologıalyq baqylaý departamenti basshysynyń orynbasary Serik Omarhanov.

Sonymen birge, departament basshysynyń orynbasary atap ótkendeı, atalmysh 5510 áskerı bólimshe Qorǵanys mınıstrliginiń qaramaǵynda, olardyń óz sanıtarlyq qyzmeti bar. Sol sebepti, Aqmola oblystyq sanıtarıalyq – epıdemıologıalyq baqylaý departamenti derttiń sebebin anyqtaýǵa jáne keshendi epıdemıaǵa qarsy sharalardy júrgizý úshin praktıkalyq kómek kórsetpekshi.

Kókshetaý qalalyq kópsalaly aýrýhanasy basshylyǵynyń málimetinshe, juqpaly aýrýlar ortalyǵyna 47 merzimdi áskerı qyzmetshi jatqyzylǵan. Naýqastar 23 tamyzdan jetkizile bastaǵan. Belgileri birdeı-qaltyraý, bezgegi ustaý, qyzýy kóterilý.

«Birinshi kúni birden altaýy jetkizildi. Bireýi óte aýyr jaǵdaıda boldy. Tekserý kezinde júrek toqtaǵanǵa deıin qurysýlar paıda boldy. Abyroı bolǵanda, reanımasıalyq sharalar sátti ótti, qazir naýqas jansaqtaý bólimshesinde, esin biledi. Bul sarbaz buǵan deıin de jelsheshekpen aýyrǵan, sol sebepti, de onyń ımýnıteti tıisinshe álsiregen. Budan keıin kún saıyn alty jáne on adam bizdiń juqpaly aýrýlar ortalyǵyna birdeı shaǵymdarmen kele bastady. Biraq olardyń qyzýy 38 gradýs shamasynda turaqty», dep túsindirdi medısınalyq mekemeniń basshysy Sáken Qalymjanov.

Dárgerdiń aıtýynsha, alty sarbaz jeksenbi kúni jetkizildi, keshe taǵy ekeýi tústi. Juqpaly aýrýlar ortalyǵynda áskerı qyzmetshilerge tolyq bólimshe bólindi. Naýqastar oqshaýlanǵan ár palatada eki adamnan.