Qyrǵyzstannyń Mádenıet, aqparat, sport jáne jastar saıasaty mınıstrligi el aýmaǵynda TikTok áleýmettik jelisin buǵattaý týraly sheshim qabyldady.

Mınıstrlikke birqatar úkimettik emes uıymnan TikTok jelisi balalardyń psıhıkalyq damýy men densaýlyǵyna teris áser etetini týraly shaǵym túsken. Onda TikTok-taǵy vıdeolardyń adam ómirine qaýip tóndiretini, jasóspirimderdiń eliktep, qaýipti oqıǵalardy qaıtalaýǵa tyrysatyny, onyń sońy ólimge ákelip soǵýy múmkin ekeni aıtylǵan.

"Osy ótinishterdi eskerip, monıtorıń negizinde Qyrǵyzstan aýmaǵynda TikTok servısin taratý qyzmetin toqtatý týraly sheshim qabyldandy" – delingen mınıstrliktiń habarlamasynda.

Bul sheshim Qyrǵyz Respýblıkasynyń zańnamasy sheńberinde odan ári iske asyrý úshin eldiń Sıfrlyq damý mınıstrligine jiberilgen.