Qazaqstanda balalarǵa zorlyq-zombylyq kórsetkenderge jaza kúsheıtiledi, dep jazady Qamshy.kz aqparat agenttigi. Bul týraly búgin prezıdent Qasym-Jomart Toqaev óziniń joldaýynda aıtty. 

"Men Memleket basshysy retinde kámeletke tolmaǵandarǵa jasalǵan zorlyq-zombylyqtyń kez kelgen túrine qatysty jazany kúsheıtýdi talap etemin. Jol, ǵımarat, kıim-keshek, azyq-túlik, ıaǵnı barlyǵy balalar úshin qaýipsiz bolýy kerek. Sondaı-aq óskeleń urpaqtyń psıhıkalyq saýlyǵy – óte mańyzdy másele", – dedi prezıdent.

Memleket basshysy bilim berý mekemelerindegi psıhologıalyq qoldaý qyzmetin ınstıtýsıonaldy túrde kúsheıtý qajettigin aıtty.

"Biryńǵaı senim telefonyn uıymdastyrǵan jón. Zorlyq-zombylyqqa jáne qysymǵa, ıaǵnı býllıngke tap bolǵandarǵa kómek kórsetýge arnalǵan baǵdarlama ázirleý kerek. Sapaly orta bilim alý – árbir balanyń myzǵymas quqyǵy. Mundaǵy eń túıindi sóz – "sapa". Sondyqtan bilim sapasyn jaqsartý jáne muǵalimderdiń biliktiligin arttyrý aýadaı qajet", – dedi Toqaev.