Qazaqstan ishki ister mınıstrliginiń qylmystyq-atqarý júıesi komıteti Atbasardaǵy túrmede azaptalǵan belsendi Tımýr Dánebaevtyń isi boıynsha qyzmettik tergeý bastalǵanyn habarlady. 

"Jelide taraǵan vıdeoda QAJD ákimshilik mekemesiniń zańdy talabyna baǵynbaý faktisiniń jolyn kesýde qyzmetkerlerdiń qyzmettik jaǵdaıyn asyra paıdalanǵany baıqalady", –  dep habarlady komıtet.

Qazirgi ýaqytta kolonıa qyzmetkerlerine qatysty qyzmettik tekserý júrgizilip jatyr. Komıtet tekserý qorytyndysy boıynsha sheshim shyǵaratyn bolady. 

Eske sala keteıik, Tımýr Dánebaev – Qańtar oqıǵasynan keıin "20 myń terrorıst týraly jalǵan aqparat taratty" dep prezıdent Toqaevtyń ústinen aryz jazbaq bolǵan. Ýkraınadaǵy soǵysqa qarsy pikir aıtqan belsendi byltyr jeltoqsanda "ultaralyq arazdyq qozdyrdy" degen kúdikpen qamalǵan edi. Astana soty 15 maýsymda belsendini úsh jylǵa bostandyǵynan aıyrǵan bolatyn. 

3 qyrkúıek kúni áleýmettik jelide túrme qyzmetkerleri ájethana jýýdan bas tartqan Tımýr Dánebaevty uryp-soǵyp, qınaǵan vıdeosy tarady. Oqıǵa 24 tamyzda Aqmola oblysy Atbasar qalasyndaǵy kolonıada túsirilgen. Vıdeoda kolonıa qyzmetkerleri sottalýshyny dýbınkamen urǵanyn kórýge bolady.