Búgin qańtarda oqqa ushqan 4 jasar Aıkórkemniń isine baılanysty sot otyrysy ótti. Qylmystyq is Almaty garnızony áskerı sotynda qaralyp jatyr.

Búgingi sot otyrysynda kýágerler tyńdaldy. Sot jabyq bolǵandyqtan,  jýrnalıster sotqa kirgizilmedi. Aıkórkemniń ákesi Aıdos Meldehan aldaǵy sot otyrysyna ózin qatystyrmaýy múmkin ekenin aıtty. 

"Kýáger retinde Farhat degen jigit pen meniń ulym tyńdaldy. Negizi sot prosesi jabyq ótip jatyr. Búgin qupıa materıaldar qaralmaǵandyqtan ǵana meni kirgizdi. Aldaǵy sot otyrystarynda qupıa materıaldar qaralatyn bolsa, meni qatystyrmaýy múmkin" – dedi Aıdos Meldehan. 

Sonymen qatar, ol bılik joǵary laýazymdaǵy áskerı qyzmetkerlerdi qorǵap qalýǵa tyrysyp jatqanyn málimdedi. 

"Sot prosesi nemen aıaqtalatyny belgisiz. Shynyna kelgende bılikke de, áskerı sotqa da senim joq. Men qarý qoldanǵandar men qarý qoldanýǵa buıryq bergenderdiń jaýapkershilikke tartylýyn ǵana talap etem. Al bılik úlken laýazymda otyrǵan áskerı qyzmetkerler men oq atqandardy jaýapkershilikke tartpaýdyń  amalyn jasap jatyr"– dedi Aıkórkemniń ákesi.