Túrkistan oblysyndaǵy 5 jasar qyzdyń ólimine baılanysty sot úkimi shyqty. Sot 48 jastaǵy Saıdolım Gaııbnazarovty «Adam óltirý» jáne «Seksýaldyq sıpattaǵy zorlyq-zombylyq áreketteri» babymen kináli dep tanyp, ómir boıyna bas bostandyǵynan aıyrdy. Sondaı-aq, oǵan hımıalyq kastrasıa qoldanýdy qaýly etti. Budan bólek,  aıyptalýshyny jábirlenýshi jaqqa 100 mln teńge kóleminde moraldyq ótemaqy tóleýge mindettedi.

Sottalýshy jazasyn qatań mekemede jazasyn óteıtin bolady. Sot otyrysyna jábirlenýshiniń týystaryn kirgizbegen. Úkim áli zańdy kúshine enbedi. 

Eske salsaq, Túrkistan oblysyndaǵy 5 jasar qyzdyń ólimi qoǵamda rezonans týdyrǵan bolatyn. Bul derek QR Qylmystyq kodeksiniń 99-baby "Adam óltirý" boıynsha tirkeldi. Saraptama taǵaıyndaldy.

Keıin Jelide aýyl turǵyndary kúdiktini polıseılerden bosatyp almaq boldy degen aqparat tarady. Túrkistan oblysy Polısıa departamentiniń ókilderi buǵan qatysty pikir bildirdi.

Bas prokýratýra málimetinshe, kúdikti buryn isti bolǵan.

"Kúdikti G. buryn adam óltirgeni úshin 2006 jyly 10 jylǵa bas bostandyǵynan aıyrylǵany anyqtaldy. 2023 jylǵy mamyrda G. ishimdik iship otyryp, aýyldasymen janjaldasqan soń, ony baltamen urǵany belgili boldy. Sot G.-nyń jábirlenýshimen tatýlasqanyn, buryn sottylyǵynyń joıylǵanyn eskere otyryp, oǵan probasıalyq baqylaý belgileýmen 3 jyl bas bostandyǵyn shekteý taǵaıyndaldy", - delingen habarlamada.