Almaty oblysynda 10 jastaǵy oqýshymen bolǵan oqıǵaǵa baılanysty arnaıy jumys toby quryldy, dep habarlaıdy oqý-aǵartý mınıstrliginiń balalardyń quqyqtaryn qorǵaý komıteti.
Buǵan deıin Almaty oblysynda qurdastary tarapynan býllıngke ushyraǵan 4-synyp oqýshysy ózine qol jumsamaq bolǵany týraly aqparat taraǵan edi.
"Osy jaǵdaıǵa baılanysty arnaıy jumys toby quryldy. Bolǵan oqıǵanyń barlyq mán-jaıyn anyqtaý maqsatynda oqý-aǵartý mınıstrliginiń, Almaty oblysy bilim basqarmasy basshylyǵynyń ókilderi bala oqıtyn mektepke jedel tártippen bardy", - delingen habarlamada.
Bul jaǵdaı oqý-aǵartý mınıstrligi balalardyń quqyqtaryn qorǵaý komıtetiniń baqylaýynda.
Komıtet atap ótkendeı, jýyrda balalardy zorlyq-zombylyqtan, sýısıdtiń aldyn alýdan qorǵaý, olardyń quqyqtary men ál-aýqatyn qamtamasyz etý jónindegi keshendi jospar qabyldandy.
Keshe 4 synyp oqýshysy mektepte álimjettik kórgen soń 10 dana aspırın iship, hat jazyp qaldyrǵan. Anasy balasyn aýyr hálde kórgen soń jedel járdem shaqyrǵan. Qazir balanyń jaǵdaıy jaqsy. Biraq mektep ákimshiligi anasyna bolǵan jaǵdaıdy eshkimge aıtpaýyn surap, oqıǵany jasyryp qalýǵa tyrysqan.
Pikir qaldyrý