Palata tóraǵasy Erlan Qoshanov bastaǵan Májilis depýtattary Ortalyq Azıa elderi men Koreıa Respýblıkasy arasyndaǵy yntymaqtastyq máseleleri jónindegi parlament spıkerleriniń I keńesine qatysty.

İs-sharada Qazaqstan, Koreıa, Qyrǵyzstan, Tájikstan, Túrkimenstan jáne Ózbekstan parlamentteriniń spıkerleri sóz sóıledi. Erlan Qoshanov Qazaqstan delegasıasynyń atynan Koreıa Respýblıkasy Ulttyq Assambleıasynyń tóraǵasy Kım Chjın Phóge samıtti joǵary deńgeıde uıymdastyrǵany úshin alǵysyn bildirdi. Ol Ortalyq Azıa elderimen jan-jaqty yqpaldastyqty arttyrý jáne óńirdiń áleýetin nyǵaıtý Qazaqstannyń syrtqy saıasattaǵy basym baǵytynyń biri ekenin atap ótti.

– Prezıdent Qasym-Jomart Toqaev aldaǵy onjyldyq Ortalyq Azıa óńiri úshin mańyzdy kezeńge aınalady dep sanaıdy. Bul rette bizge óz ekonomıkalyq múmkindikterimizdi, ortaq áleýetimizdi barynsha paıdalaný óte mańyzdy, – dedi Erlan Qoshanov.

Kezdesýdiń negizgi otyrysy Ortalyq Azıa elderi men Koreıa arasyndaǵy óńirlik yntymaqtastyqtyń basymdyqtaryna arnaldy. Májilis spıkeri óńirdegi qaýipsizdikti qamtamasyz etý basty máseleniń biri ekenine nazar aýdaryp, Qazaqstan parlamentshileri aımaqtaǵy turaqtylyqty saqtaýǵa bar kúsh-jigerin salyp jatqanyn aıtty.

– Yntymaqtastyǵymyzdyń ózekti máseleleri qatarynda klımattyń ózgerýine qarsy kúres, qorshaǵan orta men bıoalýantúrlilikti saqtaý, sý resýrstaryn, sonyń ishinde transshekaralyq resýrstardy tıimdi paıdalaný men qorǵaý bolýǵa tıis, – dedi Erlan Qoshanov.

Májilis tóraǵasy qazirdiń ózinde Ortalyq Azıa turǵyndary Aral teńiziniń ekologıalyq apatynyń, muzdyqtardyń erýi jáne jerdiń tozýynyń teris áserin sezinip otyrǵanyn atap ótti. Osy oraıda Erlan Qoshanov koreılik jetekshi mamandarmen tájirıbe almasýǵa shaqyrdy.

 Talqylaý arnaýly eki sesıada ári qaraı jalǵasyn tapty. Qatysýshylar Ortalyq Azıa men Koreıa Respýblıkasy arasyndaǵy úzdiksiz óńirlik ekonomıkalyq yntymaqtastyqtyń múmkindikteri men sıfrlyq transformasıa salasyndaǵy qarym-qatynas týraly pikir almasty. Májilis spıkeri Memleket basshysynyń bastamasymen jýyrdaǵy Joldaýynda aıtylǵan jańa ekonomıkalyq modeldi iske asyrýǵa Qazaqstannyń kiriskenin atap ótti. Munda bizdiń elimiz Koreıa Respýblıkasymen ınovasıa, jasyl tehnologıalar, energetıka, ónerkásiptik óndiris, IT jáne bank sektoryndaǵy yntymaqtastyqtyń zor perspektıvalaryn ańǵaryp otyr.

Sóz sońynda  Erlan Qoshanov qazirgi ýaqytta Ortalyq Azıa óńirinde ekonomıka, saıasat jáne mádenı baılanystar qarqyndy damyp jatqanyna nazar aýdardy. Munyń bári Koreıa Respýblıkasymen óńirlik yqpaldastyqty arttyrý úshin jańa múmkindikterge jol ashady.

İs-shara qorytyndysy boıynsha Ortalyq Azıa elderi men Koreıa Respýblıkasy parlamentteri tóraǵalarynyń «Bolashaqqa baǵdarlanǵan ózara tıimdi qatynastardy damytý» taqyrybyndaǵy alǵashqy kezdesýiniń birlesken deklarasıasy qabyldandy.

Májilistiń Baspasóz qyzmeti