"Eski Qazaqstany qaısy, jańasy qaısy" dep uqpaı júrgender bar ma edi?

Ótken senbide Astanadaǵy "respýblıkalyq Bas meshitte" (ondaı da bar) keshegi elbasymyz Nursultan Nazarbaev marqum inisi Bolat Nazarbaevtyń asyn berdi.

Bolat Nazarbaevtyń ólimine áli senbeı júrgenderdiń bar kúmáni osymen tynsa kerek.  

Bir qyzyǵy, Bolat marqumnyń asy "jabyq jaǵdaıda" ótti. Qarapaıym halyqtan eshkimdi kirgizbegen. Esesine "eski Qazaqstan" qaz-qalpynda jınaldy. Máselen, asqa kelgender arasynda tuńǵysh prezıdent Nursultan Nazarbaevtyń ózin aıtpaǵanda:

• UQK eks-basshysy Nurtaı Ábiqaev 
• Konstıtýsıalyq keńestiń burynǵy tóraǵasy Qaırat Mámı 
• Túrkistan oblysynyń burynǵy ákimi Ómirzaq Shókeev 
• İshki ister mınıstri bolǵan Qalmuhanbet Qasymov pen Erlan Turǵymbaev 
• Darıǵa Nazarbaeva men onyń kúıeýi Qaırat Sháripbaev 
• burynǵy bas prokýror Qaırat Qojamjarov 
• prezıdent ákimshiligin basqarǵan Ádilbek Jaqsybekov 
• olıgarh kúıeý bala Tımýr Qulybaev 
• Almatynyń eks-ákimi jáne "Samuryq Qazyna" qorynyń eks-basshysy Ahmetjan Esimov 
• prezıdenttiń eks-kómekshisi hám Konstıtýsıalyq keńestiń burynǵy hatshysy Qaıyrbek Súleımenov 
• burynǵy Májilis depýtaty Qýanysh Sultanov 
• prezıdent ákimshiliginde is basqarǵan Abaı Bısembaev 
• SHQO-nyń eks-ákimi Danıal Ahmetov 
• eldiń burynǵy bas ıdeology bolǵan Marat Tájın 
• burynǵy qorǵanys mınıstri Nurlan Ermekbaev 
• Nazarbaev zıatkerlik mektepterin basqarǵan Kúlásh Shamshıdınova
• tarıhshy Búrkitbaı Aıaǵan, Nursultan men Bolat Nazarbaevtardyń týǵan qaryndasy Ánıpa Nazarbaeva, keshegi "saraı bulbuly" Ermuhamet Ertisbaev sıaqty tulǵalar baıqaldy.

Bulardyń bári – kileń burynǵy basshylar bolǵanymen, qolynda áli de baılyǵy, kerek deseń kúshi, artynan erer rýlas-jymdastary bar, bylaısha aıtqanda jerde jatqan adamdar emes ekeni anyq. Qazaqstandaǵy áli talaı jerge yqpaly júredi, meshittegi osy as týraly aqparatty taratýǵa ózderiniń BAQ-taryna pármen berdi.

Nazarbaev kósile sóıledi, óz eńbegin qazaq halqy eleý kerektigin jetkizdi. Danıal Ahmetov: "Bolat Nazarbaev adal adam boldy" dedi.

Aıtpaqshy, keı basylymdarda kileń "burynǵylar" jınalǵan Bolattyń asyna "qazirgi" energetıka mınıstri Almasadam Sátqalıev qatysypty degen aqparat shyqty. Sol-aq eken, mınıstrliktiń ókili jylan shaǵyp alǵandaı jalma-jan "bul málimet jalǵan, mınıstr atalǵan is-sharaǵa qatysqan joq" dep jantalasa aqparat taratty. Eger Danıal Ahmetov aıtqandaı, Bolat adal adam bolsa, onyń asyna barýda turǵan ne bar edi, sonshama?

Degenmen, qazirgi bılikte otyrǵan sheneýnikterdiń Nazarbaevtarǵa qatysty is-sharalardan at tonyn ala qashýy tegin emes sıaqty. "Jylandy úsh kesseń de kesirtkedeı kúshi bar", eski Qazaqstan revansh jasap, bılikke qaıta jarmasýy múmkin degen kúdik bar áli qoǵamda.