Mańǵystaýda óndiris bazasynda ereýilge shyqqan 500-ge jýyq munaıshy 4 kúnnen beri dalada túnep júr. Munaıshylardyń prezıdentke jasaǵan vıdeoúndeýi áleýmettik jelide tarady. 11 jeltoqsannan beri ereýilge shyqqan munaıshylar kompanıadaǵy eńbek jaǵdaıynyń nashar ekenin, qoldanystaǵy tehnıkanyń tozyǵy jetkenin aıtady. 

"Biz, Mańǵystaý oblysyndaǵy West Oil Soft ware jumysshylary buǵan deıin zań aıasynda óz talaptarymyzdy qoıǵanbyz. Talabymyz oryndalmaı qaldy. Osy talaptardy oryndamaǵandyqtan, biz konstıtýsıalyq quqyǵymyzdy paıdalana otyryp, tótenshe sharalar qoldandyq.  Atap aıtqanda, 11 jeltoqsanda kóshege shyqtyq", - deıdi.

Sondaı-aq jumysshylar birińǵaı jalaqy tóleý júıesin engizýdi, ózin Qazmunaıgaz kompanıasyna qaıtarýdy talap etip otyr. 

Al Mańǵystaý oblysy boıynsha memlekettik eńbek ınspeksıasy WestOilSoftware kompanıasy qyzmetkerleriniń áreketine baǵa berdi. Olardyń 3 talabynyń ekeýi "eńbek arbıtrajynyń otyrysynda eskertilgen" eńbek daýyna negiz bolmaıdy dep otyr.

"Jumysshylardyń bir talaby qanaǵattandyryldy, sondyqtan jumysshylardyń ereýilge shyǵýy eńbek zańnamasyna sáıkes, negizsiz bolyp tur. Bólim basshysy atalǵan kásiporyn qyzmetkerleriniń talaptary boıynsha eńbek zańnamasynyń normalaryn túsindirdi. Bul talaptar daýdy jáne problemalyq máselelerdi sheshetin múmkindikti qarastyrý úshin qurylǵan kelisim komısıasy men eńbek arbıtrajynyń otyrysynda qaraldy. Osylaısha, úsh talaptyń biri – kólikter men arnaıy tehnıkalardy jańǵyrtý "QazMunaıGaz" jáne "Munaı kólik korporasıasy" kompanıalarynyń ókilderimen birneshe ret talqylandy. 16 qarashada ótken eńbek arbıtrajynyń otyrysynda kópshilik daýyspen "QazMunaıGaz" kompanıasy usynǵan baǵdarlama boıynsha kólik tehnıkasyn jańartý talabyn qanaǵattandyrý týraly hattamalyq sheshim qabyldandy", - dep habarlady vedomstvo ókili .