Májilis depýtaty Rınat Zaıytov qazaqstandyqtardan polısıa qyzmetine kóp shaǵym túsetinin aıtty.

«Bile bilseńizder, Qazaqstan Respýblıkasy óz bıligin kúsh qurylymdaryna pármendi esirsin dep emes, eskersin dep beredi. Halyqty qorlasyn dep emes, qorǵasyn dep beredi?! Sondyqtan, búgingi shuǵyl saýal joldaýymyzdyń sebebi –qarapaıym halyqtyń únin, muń-muqtajyn, talap-aryzyn Sizderge jetkizýdiń sońǵy amaly desek te bolatyn shyǵar. Óıtkeni, sharasyz halyq bizder – depýtattarǵa sońǵy ınstasıa retinde, basqa organdardan kómek kúte almaǵan soń ǵana júginedi», - deıdi ol bas prokýrorǵa joldaǵan saýalynda.

Rınat Zaıytov depýtattardyń atyna óńirlerdegi kúsh qurylymdary qyzmetkerleriniń áreketine shaǵym jıi túsetinin jetkizdi.  

«Olarǵa Almaty, Shymkent, Óskemen, Semeı, Jańaózen jáne taǵy basqa qalalardan túsken birqatar shaǵymdy jatqyza alamyz. Onda Ata zańymyzben bekitilgen, adam jáne adamnyń ómiri, onyń quqyǵy men bostandyǵyn qorǵaý sıaqty aıryqsha quqyqqa ıe – kúsh qurylymy qyzmetkerleri ózderiniń «jedel izdestirý is-sharalaryn» jamylyp, jeke maqsatta áreket etetinderi málimdelip jatyr», - dedi depýtat.

Depýtat aıtqan sózine naqty mysaldar keltirdi.

«Mysaly, Shymkent qalasynyń turǵyny, jalǵyz basty ana - A.A. Mamaevanyń jáne onyń uly alaıaqqa tap bolyp, shamamamen 4 mln teńgeden aıyrylǵan eken, bul faktini anyqtap, Shymkent qalasynyń Eńbekshi aýdandyq polısıa basqarmasyna aryzymen júgingen. Alaıda, ótinish ıesiniń aıtýynsha, quqyq qorǵaý organdary qyzmetkerlerimen tanystyǵynyń arqasynda, aıyptalýshynyń ústinen qozǵalǵan qylmystyq is, belgisiz sebeptermen birneshe ret toqtatylǵan jáne jábirlenýshi men onyń ulyna ashyq túrde qoqan-loqy kórsetilgen. Sonymen, 2021 jyldyń tamyzynda qozǵalǵan is búgingi tańǵa deıin sotqa jetpegen», - deıdi ol.

Sondaı-aq, qoǵamdyq qabyldaýǵa kelgen Shyǵys Qazaqstan oblysy Óskemen qalasynyń turǵyny, ótinish ıesi Z.A. Totanovanyń atynan aryz qaldyryp, aıtyp jetkizgen jaıt tipten oıǵa qonymsyz deıdi depýtat. Onyń aıtýynsha jábirlenýshiniń ózine aımaqtyq kúshtik qurylym qyzmetkerleri tirideı máıit qazdyryp, azap kórsetken.

«Osyndaı isti sotqa deıin jetkizbeý, ne tipti isti qozǵamaý, bıligin asyra paıdalaný jáne taǵy da sol sıaqty is-áreketter týraly meniń osyndaǵy áriptesterim de aıta alady. Sondaı-aq, bul İshki ister mınıstrligindegi «qujaty bar qaraqshylar men qarýy bar qorqaýlar» óz qyzmettik mansabyn asyra paıdalanyp, qyzdardy zorlaý faktisimen ózderi ustalyp otyr. Osy rette, bularǵa senim qaıdan bolsyn?! Quzyretin qylmysty azaıtý úshin emes, tabysyn kóbeıtý úshin paıdalanatyn qyzmetkerlerge nege shara qoldanbaımyz?» - deıdi ol.