Álemge tanymal Gollıvýd aktery Leonardo Dı Kaprıo Qazaqstan bıligin kıik sanynyń kóbeıýimen quttyqtady. Bul týraly akter óziniń Instagram paraqshasynda jazdy. 

"Buryn-sońdy bolmaǵan mundaı qalpyna keltirý Qazaqstanda kıik popýlásıasynyń keremet saqtalǵanyn kórsetedi. 2005 jyly nebári 48 myń bas bolsa, qazir 1,9 mıllıonǵa deıin jetti. Brakonerlikke qarsy kúres bastamalaryna, quqyqtyq tártipti belsendi qamtamasyz etýge jáne jańa qorǵalatyn aýmaqtardy qurýǵa qomaqty qarajat salǵan Qazaqstan úkimetin quttyqtaımyz. Olardyń tabıǵatty qorǵaý uıymdarymen, ýnıversıtettermen jáne ǵalymdarmen yntymaqtastyǵy – birlesken kúsh-jigermen qol jetkizilgen tabıǵatty qorǵaýdaǵy shynaıy tabystyń jarqyn mysaly", dep jazdy Leonardo Dı Kaprıo. 

Alaıda akter bıyldan bastap Úkimettiń eldegi kıikterdi atýǵa resmı túrde ruqsat etkenin estimegen sekildi. Ekologıa jáne tabıǵı resýrstar mınıstri Erlan Nysanbaevtyń bul sheshimi halyqtyń narazylyǵyn týdyrǵan bolatyn. 

Kıeli janýardy atýǵa ruqsat bergen mınıstrlik muny kıiktiń sany ósip, tarıhta bolmaǵan mólsherge jetkenimen baılanystyrady. Sońǵy sanaq boıynsha aqbókenderdiń sany 2 mıllıonǵa deıin jetken. Sondyqtan 337 myń kıikti qysqartý kerek. Óıtkeni mınıstrlik kıikten kelgen zalal 8 mıllıard teńgege jýyqtaǵanyn aıtyp otyr. Bıyl aqbókender 1 mıllıon 284 myń gektar jaıylym-shabyndyqty taptap, 5 myń gektar egindi otap ketipti.