Áleýmettik jelide shetelden kelip anasyn izdep júrgen Jánibektiń ákesine qatysty aqparat paıda boldy. Bul týraly "Barmysyz, baýyrym?" habarynyń júrgizýshisi Qymbat Josjan habarlady. 

“Qudaıǵa shúkir. Er-azamattar oıana bastady. "Men Jánibektiń ákesi bolýym múmkin, DNQ analız tapsyraıynshy" dep bir Baýyrjan esimdi er jigit habarlasty. Búgin Ásel Asqarqyzymen birge klınıkaǵa baryp, Baýyrjan qan tapsyrdy. Endi nátıjesin kúteıik, - dep jazdy jýrnalıs.

Buǵan deıin «Jánibektiń (Jani Eddy J Saveliev) anasy bolýy múmkin» degen kelinshek DNQ saraptamasyn tapsyrǵan edi. Ózin Murat dep ataǵandy unatatyn belgıalyq balanyń úmiti aqtalmady. DNQ saraptamasy teris nátıje kórsetti.

Esterińizge salsaq, áleýmettik jelide shetelde turatyn Jánibek esimdi (qazirgi qujatynda EddJan) jas jigittiń Qazaqstanǵa kelip, anasyn izdep jatqany týraly vıdeo jarıalanǵan edi. Belgili bolǵandaı, Jánibek 2002 jyly 17 qańtarda Arqalyqta týǵan. 2004 jyly sol qaladaǵy balalar úıinen qazirgi belgıalyq otbasy, ıaǵnı jalǵyzbasty anasy asyrap alýǵa alyp ketken.