Dinmuhamed (Dımash) Ahmetuly Qonaev – memleket jáne qoǵam qaıratkeri, úsh márte Sosıalısik eńbek eri, Qazaq KSR Ǵylym akademıasynyń akademıgi, tehnıka ǵylymdarynyń doktory.

Birneshe márte KSRO Joǵary Keńesiniń depýtaty bolyp saılandy. KOKP-nyń XIX-sezinen bastap, keıingi sıezeriniń bárine delegat boldy. Parlament jáne partıa delegasıasyn basqaryp, áldeneshe ret shetelderde bolyp qaıtty.

Dinmuhamed Ahmetuly el basqarǵan jyldary keń baıtaq qazaq jerinde 68 jumysshylar kentimen 43 qala paıda boldy. Keńsharlar men ujymsharlar salyndy. Mal sany kóbeıip, aýyl sharýashylyǵynyń ónimderi jyl saıyn artyp otyrdy.

Dinmuhamed Ahmetuly arqasynda Qazaqstannyń ónerkásip, onyń ishinde túrli-tústi metalýrgıa salasy joǵary deńgeıde damydy.

Qazaqstan Respýblıkasynyń Ulttyq ǵylym akademıasynyń akademıgi Dinmuhamed Ahmetuly Qonaev ǵylym salasynda orasan zor qyzmet etti. 100-den asa ǵylymı eńbektermen zertteýler jazdy. Biraz ǵylymı jumystaryn sharýashylyq pen óndiristik tájirıbeden ótkizdi. Óz eńbekteriniń halyq sharýashylyǵyna tıgizer paıdasynyń zor ekendigin is júzinde dáleldegen edi. Óndiris tıimdiligin arttyrýmen qatar, ol jas ǵalymdardy qoldap, bilim júıesine erekshe kóńil bóldi.

Qazaq ónerin joǵary baǵalaǵan Dinmuhamed Ahmetuly ónerde júrgen jandardy jan-jaqty qoldap, qazaq mádenıetiniń damýyna yqpal etti. Óner ordalary salynyp, mádenıet úıleri óz qyzmetin bastady. Qazaq jeriniń barlyq aımaqtarynda derlik bilim jáne mádenı oshaqtar ashylyp, turǵyn úıler turǵyzylyp, áleýmettik nysandar salyndy.

Dinmuhamed Ahmetuly Qonaevtyń bastamasy boıynsha qazaq jeriniń sol kezdegi astanasy Almaty qalasynda Úkimet úıi, Qazaqstan Kompartıasynyń Ortalyq Komıtetiniń ǵımaraty, Qazaqstan Respýblıkasynyń Ulttyq Ǵylym Akademıasynyń ǵımaraty turǵyzyldy. Qala kósheleriniń sany artyp, jańa turǵyn úıler salynyp, 12 yqsham aýdan ashyldy. Mektep pen bala-baqsha ǵımarattarynyń qurylysy bastalyp, Oqýshylar saraıy jas ónerpazdarǵa esigin aıqara ashty. Respýblıka Saraıy, Sport jáne Mádenıet Saraıy, «Medeý» sport kesheni, Ulttyq Kitaphana, sırk syndy mádenıet, bilim jáne sport nysandary boı kóterdi. Avto, aero jáne temir jol vokzaldary, áýejaı, «Almaty», «Otyrar», «Jetisý», «Alataý», «Dostyq», «Qazaqstan» qonaqúıleri salynyp, qala kórkin ashty.

Dinmuhamed Ahmetuly Qonaev Respýblıka partıa uıymyn basqarǵan shırek ǵasyrǵa jýyq ishinde óziniń úlken mádenıettiligimen, ımanjúzdi izettiligimen, tanylyp, halyq dástúrin jaqsy biletin, taǵylymy tereń, oı-óresi bıik jan ekenin kórsetti. Keıin memleket isinen qol úzgen kezde de ol bilimdar bilikti jan retinde elde júrip jatqan reforma baǵyttaryn, qoǵamdy demokratıalandyrý qajet ekenin tereń túsinip, qoldaı bildi.

Qoǵam qaıratkeriniń eńbegin eskerip, Almaty oblysynyń qazirgi ortalyǵy Dinmuhamed Qonaevtyń esimin berý týraly sheshim qabyldanǵan.