Keshe áleýmettik jelide belsendi Rýza Beısenbaıteginiń psıhologıalyq ortalyqqa jatqyzylǵany týraly aqparat qyzý talqyǵa tústi. Qamshy.kz aqparat agenttigi tilshisi óńirdegi densaýlyq basqarmasyna habarlasqan bolatyn. Basqarma ókili aqparatty rastady. 

"Naýqas Pavlodar oblystyq psıhıkalyq densaýlyq ortalyǵyna 24 qańtar kúni saǵat 16.30-da túsken. Ózge málimetter “Halyq densaýlyǵy jáne densaýlyq saqtaý júıesi týraly» Kodekstiniń 273-babynyń negizinde jarıa etilmeıdi", dedi basqarma ókili. 

Áleýmettik jelidegi narazylyqtardan keıin búgin til janashyry Rýza Beısenbaıtegi bostandyqqa shyqty. Alaıda ony psıhologıalyq ortalyqtyń esebine tirkegen.  

"Oqıǵa ornyna kelgen medısınalyq brıgada psıhıkalyq aýytqýlary belgilerimen R.B. esimdi 66 jastaǵy áıel adamdy Pavlodar oblystyq Psıhıkalyq densaýlyq saqtaý ortalyǵyna jetkizdi.

Ortalyq dárigerleri tarapynan naýqasqa eki kún boıy em qabyldaý sharalary jasaldy. Medısına qyzmetkerleriniń qaraýynan keıin densaýlyq jaǵdaıynyń jaqsarýyna oraı, konsılıým sheshimimen naýqas dıspanserlik baqylaý usynysymen úıine qaıtaryldy.

Densaýlyq saqtaý salasyndaǵy zańnamaǵa sáıkes, aldaǵy ýaqytta naýqastyń psıhıkalyq aýytqýlary nasharlap, aınalasyndaǵy adamdarǵa zıan keltirý yqtımaldyǵy qaıta baıqalǵan jaǵdaıda, ol emdeýge jiberiletin bolady", – dep habarlady Pavlodar oblysy DSB.