Qazaqstannyń birinshi, álemniń 5-raketkasy Elena Rybakına Ábý-Dabı WTA 500 týrnıriniń jeńimpazy atandy, dep habarlaıdy Qazaqstan tenıs federasıasynyń baspasóz qyzmeti.
Qazaqstandyq tenısshi fınalda álemniń 14-raketkasy, reseılik Dará Kasatkınamen bas júldeni sarapqa saldy. Osyǵan deıin qarsylastar tórt márte kezdesken edi. Esep teń – 2:2.
Bul joly birinshi partıada Rybakına bet qaratpady – 6:1. Elena ekinshi sette de breıkpen alǵa ketkenimen, reseılik tenısshi sol boıda tarazy basyn teńestirdi – 2:2.
Esep 4:4 bolǵan mezette Rybakına taǵy bir breık jasaı aldy – 5:4. Sodan keıin machqa dop bergende, qatelesken joq – 6:4.
Bir saǵat 10 mınýtqa sozylǵan báseke barysynda Elena 3 eıspen birge 10 breık-poınttyń altaýyn óz esebine jazdy.
Osylaısha, bıyl Elena Rybakına WTA 500 jarysynda ekinshi ret jeńimpaz atandy. Ol ótken aıda Brısbende (Aýstralıa) úzdik shyqqan edi.
Pikir qaldyrý