Ulttyq statısıka búrosynyń málimetinshe, 2024 jylǵy 1 qańtardaǵy jaǵdaı boıynsha, Qazaqstanda halyq sany 20 033 546 adamdy qurady, onyń ishinde qala turǵyndary – 12 451 004 (ósim 1,9%), aýyl turǵyndary – 7 582 542 adam (ósim 0,3%).

12 aı ishinde halyqtyń jalpy ósimi 266 739 adamdy qurady. Onyń ishinde tabıǵı ósim esebinen 257,3 myń adam, kóshi-qon esebinen 9 344 adammen tolyqty.

Óńirler bólinisinde tabıǵı ósimniń oń máni SQO-dan basqa barlyq óńirde tirkeldi, al kóshi-qonnyń oń saldosy bes óńirde baıqaldy – Almaty jáne Mańǵystaý oblystary men Astana, Almaty, Shymkent qalalarynda.

12 aıda Qazaqstanda 387,9 myń bala dúnıege keldi (2022 j. – 403,5 myń), onyń ishinde 200,3 myńy – uldar, 187,6 myńy – qyzdar. 1000 adamǵa shaqqanda týý koefısıenti 19,50 qurady. Atalǵan kezeńde 130,6 myń adam qaıtys boldy, bul rette ólim-jitim koefısıenti 1000 adamǵa shaqqanda 6,56 boldy.

Týýdyń eń joǵary deńgeıi Mańǵystaý (1000 turǵynǵa 26,78 adam), Túrkistan (26,11) oblystarynda jáne Shymkent qalasynda (25,68) baıqaldy.

12 aıda 1 jasqa tolmaǵan 3215 náreste qaıtys boldy, 2022 jylmen salystyrǵanda náreste óliminiń koefısıenti tómendep, 1000 týylǵanǵa 7,69 qurady (2022 jyl – 7,97).

Atalǵan kezeńde tirkelgen nekeler men ajyrasýlar sany da azaıdy. 2023 jyldyń 12 aıynda 120 myń neke tirkeldi, 2022 jylmen salystyrǵanda neke sany 5,9% tómendedi. Neke koefısıenti 1000 adamǵa 6,07 qurady. Sondaı-aq osy kezeńde 16,7 myń ajyrasý tirkeldi (sottyń nekeni buzý týraly sheshimin esepke almaǵandaǵy AHAT organdarynyń derekteri boıynsha), bul da 2022 jylǵy deńgeıden 5,3% az. Ajyrasý koefısıenti 1000 adamǵa 0,84 qurady.

Óńiraralyq kóshi-qon boıynsha oń saldo elimizdiń 3 óńirinde qalyptasty: Almaty (38,1 myń adam), Astana (50 myń adam) jáne Shymkent (3,4 myń adam) qalalarynda.

2023 jylǵy qańtar-jeltoqsanda elge syrttan kelgenderdiń sany 25,3 myń adamdy, ketkender sany 16 myń adamdy qurady. Kóshi-qon saldosy 9 344 adam boldy. 2022 jyldyń tıisti kezeńimen salystyrǵanda Qazaqstanǵa kelgender sany 46,8%, ketkender sany 33,8% azaıdy. Aıta keteıik, kóshi-qon saldosy 2011 jyldan beri alǵash ret oń mán kórsetip otyr. 

Negizgi kóshi-qon almasý TMD memleketteri arasynda júrgen. TMD elderinen kelgenderdiń sany 21,9 myń adamdy qurasa, sol elderge turaqty turýǵa ketkenderdiń sany 12,4 myń adamdy qurady.