«Aldymnan bir jasóspirim shyǵa keldi. Jalańaıaq jylap tur. Qoryqqanynan kóliktiń artyna tyǵylyp qaldy. Ne bolǵanyn suradym. Ol maǵan soqqyǵa jyǵylǵanyn aıtty», deıdi oqıǵa kýágeri Abzal Shákenov Almaty telearnasyna bergen suqbatynda.

Sol aradaǵy bar adam balaǵa kómek berip, mán-jaıdy polıseıge habarlapty. Al jetkinshektiń ózi aýrýhanaǵa jetkizilgen. Dárigerler soqqydan onyń mıy shaıqalǵanyn anyqtady.

Aýrýhanada jatqan bala oqıǵanyń mán-jaıyn búge-shúgesine deıin aıtyp berdi. Ol oqıǵaǵa deıin de ózin nashar sezingen. Biraq mekeme qyzmetkerleri onyń sózin elemepti. «Oqymaý úshin oılap tapqan syltaýyń» dep jetkinshektiń sózine senbeı, kıkiljiń shyǵarǵan.

«Men oqymaımyn, ketemin» dese, ustazy «Bar kete ber, qaıda ketesiń?» degen. Ol júgirip bara jatqan kezde, ustap qalyp, betinen urǵan. Balanyń psıhıkasyna da áser etip tur. Bala sharshady. Shynyn aıtqanda, beti-aýzynyń bári isip tur», dedi balanyń anasy Nazıra Asylbekova.

Bıik qorshaý, úlken ǵımarat ishinen shyqqan osy shýdan keıin polıseıler mán-jaıdy anyqtaýǵa kiristi.

«Qazirgi tańda dene jaraqatynyń aýyrlyq deńgeıin anyqtaý maqsatynda sot-medısınalyq saraptama taǵaıyndaldy. Saraptama qorytyndysy shyqqan sátte is materıaldary sotqa jiberiledi», dedi qalalyq PD-nyń resmı ókili Saltanat Ázirbek.

Aıta keteıik, bul pansıonatqa qatysty alǵashqy daý emes. Qaıyrymdylyq mekemesi kúdikti áreketimen buǵan deıin de birneshe ret kózge túsken. Byltyrǵy qańtarda olarǵa tártip saqshylary aýqymdy tekseris júrgizip, oqıǵa ornynan Qazaqstanda tyıym salynǵan dinı ádebıetter tabylǵanyn málimdedi. Sol kezde de mekemede balalarǵa túrli qysym kórsetilgeni aıtylǵan bolatyn. Quzyrly organdaǵylar dereginshe, mundaı pansıonattar Almatyda ǵana emes, eldiń ózge óńirinde de bar. Jalpy sany 90-nan asady. Barlyǵy bir qaıyrymdylyq qoryna qaraıdy. Búginde sol qaýymdastyqtyń qyzmeti sot sheshimimen toqtatylǵan, alaıda úkim zańdy kúshine enbegen. Sebebi basy daýǵa qalǵandardyń appelásıalyq shaǵym túsirýge áli quqyǵy bar.