21 aqpan kúni Qaraqıa aýdanynyń ákimi Symbat Tóretaev Jetibaı aýylynyń turǵyndarymen kezdesti. Kezdesý barysynda aýdan basshysy Jetibaıda ereýilde turǵan “West Oil” mekemesi jumysshylarynyń ata-analary tarapynan qoıylǵan suraqtarǵa jaýap berdi, dep habarlaıdy mangystaumedia.kz.

Aýdan ákimi jumysshylardyń keıbir talaby orynsyz ekenin aıtty. Sol sebepti teketires jasamaı, jumysty jalǵastyrýy kerek dep otyr.

- Ereýilshiler qoıyp otyrǵan úsh talaptyń ekeýi mekemeniń quzyryna kirmeıdi. Mekeme tek qana tehnıkany jańartýdy iske asyra alady. Al «QazMunaıGazǵa» aýystyrý jónindegi talapty mekeme sheshe almaıdy. Keshe QMG-nyń resmı ókili Jasulan Balýanov «QMG-ǵa bul adamdardy jumysqa almaımyz jáne jańa mekeme qurmaımyz, biraq SIMAZ degen kompanıamen 72 tehnıka satyp alý jóninde kelisimshart jasaldy» dep aıtty. Al naýryz aıynyń alǵashqy onkúndiginde 26 tehnıka mekemege jiberiletin boldy. Osy jyldyń ekinshi jartyjyldyǵynda jumysshylardyń barlyq jaǵdaıy jasalady.

Bul másele sheshimin taýyp jatyr. Jumysqa shyqsa jalaqysy azaımaıdy. Osy ýaqytqa deıin 100-ge jýyq adam ereýildi toqtatyp, jumysqa shyqty. Jumysty toqtatýdyń beker ekeni, talaptyń orynsyz ekeni túsingen adamǵa belgili. Olardyń eń tómengi jalaqysy 380 myń teńge, ortasha aılyǵy 730 myń teńge, al eń kóp eńbekaqysy 890 myń teńge. Áleýmettik paket te qarastyrylǵan. Bul jerde azamattar eshqandaı teketires jasamaı, túsinistik tanytýy tıis dep esepteımin, - dedi Symbat Tóretaev. Aýdan ákimi kezdesý sońynda ereýilde turǵan jumysshylardy týyndaǵan máseleni kelissóz ústelinde talqylap, ortaq sheshimge kelýge shaqyrdy.