Patrıottardyń res­pýb­lıkalyq forýmy Elbasy Nursultan Nazarbaevtyń tapsyrmasymen júzege asyryla bastaǵan «Úlken el – úlken otbasy» jalpyulttyq jobasyn barlyq halyqtyń qoldaýynyń bir kórinisi boldy. Elimizdiń patrıottary qazaqstandyq tutastyq pen birtektilikti biraýyzdan qoldaıtyndaryn bildirdi.

Qazaqstan halqy Assambleıasynyń HHİİ sesıasynda sóılegen sózinde Pre­zıdent Assambleıanyń bes ınstıtýttyq reformanyń júzege asyrylýyndaǵy osy uıymnyń róli zor ekenin atap ótti. Assambleıanyń mańyna shoǵyrlanǵan qa­zaqstandyqtardyń birligi men belsen­diliginen ulttyń birtektiligi jónindegi jospar iske asatyny aıqyn.

Osy sesıada Elbasy Nursultan Nazar­baev qazaqstandyqtardyń birtek­tiligin nyǵaıtatyn jáne azamattyq qoǵam­nyń bútindigin qalyptas­tyratyn osynaý ult­tyq jobany ázirleý men jáne júzege asyrýdy Qazaqstan halqy Assambleıasyna tapsyrǵan edi. Onyń tusaýy patrıottardyń respýblıkalyq forýmynda kesilgendiginiń sımvoldyq mańyzy zor. Ol qazaqstandyq qoǵam­dyq kelisimniń birtek­tiliginiń bıik nysanasy ekeni aıqyn. Bolashaqtyń birtutas ulty degenimizdiń ózi «Úlken el – úlken otbasy» degenniń mánin bildirip tur. Bul jobadan ózin qazaqstandyqpyn dep sanaıtyn árbir azamat óziniń ornyn tabady. Sonymen qatar, bárimiz bizdi biriktiretin ustanymdy tabamyz.

«Úlken el – úlken otbasy» jobasy 35 is-sharadan turady. Olardyń bári de qoǵamdyq kelisimdi nyǵaıtý, jal­pyulttyq birlikti tereńdetý sala­syndaǵy áleýmettik mańyzy bar is­terdi qamtyǵan. Olardyń qatarynda Qazaqstan halqy Assambleıasynyń taqyryptyq is-sharalar tizimi aıasyndaǵy qazaqstandyq birtektilikti damytý men nyǵaıtýǵa baǵyttalǵan áleýmettik jobalardy iske asyrý, ıntellektýaldy, mádenı jáne rýhanı stımýldardy qurý, etnosaralyq saıasattyń sátti negizin qalaıtyn biregeı ınstıtýt retinde Qazaqstan halqy Assambleıasynyń ǵy­lymı jáne ádistemelik bazasyn qurýǵa múmkindik beretin baǵdarlamalardy ázirleý jáne engizý, sonymen qatar, azamattardy QHA mádenı, bilim jáne qaıyrymdylyq jobalaryn iske asyrýǵa tartý arqyly áleýmettik bazasyn keńeıtý bar. Osylardyń bárin atqarý 2018 jylǵa deıingi merzimge belgilengen. Bul joba QHA-nyń damý tarıhyndaǵy jańa kezeńniń bastamasy bolyp, onyń eldegi áleýmettik-ekonomıkalyq prosesterge qatynasý formatynyń jańǵyrýy dep eseptelinedi. Olardy qazaqstandyq jańa patrıotızmdi qurýdyń kilti dep te sanaýǵa bolady. Árıne, onyń bazalyq tuǵyrnamasy Memleket basshysy Nursultan Nazarbaevtyń «Máńgilik El» ıdeıasyn júzege asyrýǵa baǵyttalǵan. Sondyqtan Qazaqstan halqy Assambleıasynyń úıles­tirý jumystarynyń jańa kezeńi Bolashaqtyń birtutas ultyn qalyp­tas­tyrýǵa baǵyttalady. Árıne, bul jobany QHA jalǵyz ózi iske asyra almasy belgili. Oǵan kómek kórsetetin uıymdar qatarynda barlyq memlekettik organdar, QHA-nyń qoǵamdyq ınstıtýttary jáne qazaqstandyq barlyq azamattar men azamattyq qoǵamnyń ınstıtýttary. Osy atalǵan uıymdar men qoǵamdar kúsh biriktirgende ǵana jobany iske asyrý jumystary sátti bolary aıqyn.

Jobany iske asyrý jónindegi 2016 jylǵy jumystardyń bári de Qazaqstan Táýelsizdiginiń 25 jyldyǵy aıasynda júrgiziletin bolady. Oǵan belsendiler osy kúnniń ózinde daıyn ekendigin bildirip otyr. Tipti, jobanyń tusaýy kesilgen 5 qazannan beri de birtalaı mańyzdy jumystardyń boljamdary aıqyndalyp qaldy. Sonyń ishinde Qazaqstannyń dúnıejúzilik formattaǵy alatyn orny, 25 jylda qol jetkizgen tabystary erekshe kórinistermen aıshyqtalýy kerektigi aıtyldy. Bul qatarda úlken aýqymdy sharalar jasalatyny belgili bolyp otyr. Sonymen, barlyq jyldardaǵy jumystarǵa da qazaqstandyqtardyń tereń belsendilikterin, qyzyǵýshylyqtaryn qoldaný kerektigi kórinip tur. Aıta ketetin jaıt, Elbasy Nursultan Nazarbaev HHİİ sesıada osy jobany ataǵan soń-aq kóptegen qoǵamdyq ınstıtýttar, ÚEU ózderiniń osynaý jobaǵa qatysqysy keletindikterin aıtty. Osynyń ózinen-aq jobanyń barlyq halqymyzdyń júregindegi dúnıeni dál basqany kórinip tur. Qazirdiń ózinde bas­talyp ketken jumystardyń ishinde óte qyzǵylyqty jobalar bar. Sonyń ishinde óte mazmundy dúnıelerdiń bar ekendigin atap ketýge bolady.

Osy qatarda men Taraz qalasynda bolyp ótken Qazaq han­dy­ǵ­ynyń 550 jyldyǵyn toılaý sharalary týraly da óz pikirimdi bildire ket­kim keledi. Bul shara da qazaq­standyqtardyń bir­tutas­tyǵyn, bir arman men biregeı maqsatta ekenin kór­setti dep sanaımyn. Bul isten Qazaqstan halqy As­sam­bleıasy da tys qalmaı, ótki­zilgen sharalarǵa belsene qatysyp, halyqtyń tarıhı sanasyn kóterip, biliktiligin arttyrýǵa óz úlesin qosty. Sonyń ishinde «Uly Dala eli» degen 30000 shaqyrymdyq joldy artqa tas­tap kelgen ekspedısıanyń jumysyn qorytyndylaýǵa qatysty. Oǵan bizdiń «Qoǵamdyq kelisim» RMM ǵylymı-saraptamalyq qyzmetiniń basshysy Nurbek Shaıahmetovtiń da qatysqanyn maqtan etemiz. Osy ekspedısıa barysynda úlken jańalyqtar ashylǵanyn da aıta ketý kerek. Sonyń bárin biz artynan qorytyp, qazaqstandyq jáne sheteldik jýrnalıserge habarlaıtyn bolamyz. Óıtkeni, onda kóptegen adamdar úshin buryn múlde belgisiz bolǵan dúnıelerdiń ashylatynyna senimdimiz. Tek qysqasha ǵana toq­ta­la ketetin bolsaq, úsh baǵytta úsh toppen shyq­qan ekspedısıa úlken ju­mystar atqardy. Eks­pedısıa qatarynda esim­deri elimizge belgili ǵa­lymdar, etnograftar, ólketanýshylar boldy. 30 myń shaqyrym jol­dy artqa tastaǵan ekspe­dısıaǵa qatysýshylardy oblys ákimi Kárim Kó­kirekbaev qarsy aldy. Ekspedısıaǵa sheteldik ǵalymdar da qatysty. Sonyń biri Shyǵys Qytaı ýnıversıtetiniń profesory Ian Chený ózine Qazaqstan týraly kóptegen jańa derekter alǵanyn aıtty. Osy ekspedısıaǵa baılanys­ty uıymdastyrylǵan konferensıada Nurbek Shaıahmetov úlken baıandama jasady. Onda bizdiń áriptesimiz halyqtyń tarıhı sanaǵa degen umtylysynyń deńgeıi arta túskeniniń kýási bolǵanyn aıt­ty. Óıtkeni, ekspedısıa baǵytynda toq­taǵan barlyq eldi mekenderde bizdi qar­sy alǵan halyq isimizge qyzy­ǵý­shy­lyq­tar bildirip, kóptegen suraqtar berdi dedi ol.

Sózimniń sońynda «Úlken el – úlken otbasy» jalpyulttyq jobasyn iske asyrý aıasynda qaıyrymdylyq sharalar da ótkiziletinin eske salǵym keledi. Sonyń ishinde «Meıirim kerýeni», «Qoǵamdyq kelisim keńesteriniń forýmy» sıaqty sharalar bolady. Memleket basshysy óziniń QHA HHİİ sesıasynda sóılegen sózinde bul uıymnyń barlyq qaıyrymdylyq aksıalaryn birlestiretin ortalyqqa aınalýy kerektigin atap aıtqan edi. Sonyń ishinde Prezıdent: «Qazaqstan halqy Assambleıasynyń qory sońǵy bes jylda Ana men bala ulttyq ortalyǵyndaǵy onkogematologıa bólimshesindegi naýqas balalardy qoldaýmen aınalysyp keledi. Al ózbek halqynyń «Doslyq» etnomádenı ortalyǵy balalar úıi men qarttar úıine qaıyrymdylyq kerýenderimen azyq-túlik jetkizip júr, qazaqstandyq nemisterdiń «Vozrojdenıe» etnomádenı birlestigi áleýmettik stansalardyń respýblıkalyq júıesin quryp, múm­kindigi shekteýli adamdardyń bárine kómektesýde» degen edi. Sóziniń sońynda Elbasy osyndaı uıymdardyń bárine óziniń alǵysyn jetkizgen. Mine, osy dástúr Qazaqstan halqy Assambleıasynda jalǵasyn taýyp, jyldan-jylǵa jańa bıikterge kóterilip keledi. Elbasy Úkimet pen bıznestiń qoldaýyna súıenip osyndaı aksıalardy uıystyrýdyń ortalyǵyna aınalsyn degen naqty tapsyrma da bergen. Osy tapsyrmany oryndaý «Úlken el – úlken otbasy» jalpyulttyq jobasynyń sheńberinde de iske asyrylatyn bolady. Bul iske biz belsendi múshelerimizben qatar barlyq deńgeıdegi depýtattardyń da qatysýyn qalaımyz. Aldaǵy ýaqytta biz «Meıirim kerýeni» jobasynyń qalaı iske asyrylatyny týraly jýrnalıserge arnaıy aıtatyn bolamyz.

Biz «Úlken el – úlken otbasy» jobasyn áleýmettik jeliler arqyly jyljytý úshin blogerler asosıasıasymen kelissózder júrgizip, olarmen áriptestik qatynastar ornattyq. Qoldanýshylarǵa bul joba úlken qyzyǵýshylyq týdyrdy. Olardyń tarapynan kóptegen suraqtardyń túsip jatqany sonyń aıǵaǵy. Máselen, bizdiń bir-aq ekspedısıa jasaý jobamyzǵa ǵana 412 saýal-derekter tústi. Sonymen qatar, 2 myńnan artyq pikirler jazyldy. Bıylǵy Assambleıa jylynda jasalǵan jobalarymyz uıymnyń tolyǵymen jańǵyrýyna áser etedi degen oıdamyn. Búgin barlyq baǵyttarda bizdiń azamattyq ınstıtýttarmen birlesken ju­mys­tar qyzý júrgizilip jatyr. «Ulttyq teatr­lar festıvali» degen on jyldan ar­tyq ýaqyt boıy ótkizilip kele jat­qan jobamyz endi jańa mazmundaǵy dúnıe­lermen tolyqtyrylmaqshy. Onyń ekin­shisi «Jibek jolyndaǵy áńgime» jobasy.

Derekkóz: "Egemen Qazaqstan" gazeti