Ortalyq komýnıkasıalar qyzmetinde ótken kezekti baspasóz máslıhaty «Kámelettik jasqa tolmaǵan jasóspirimder quqynyń qorǵalýy men saqtalýyn jáne ony zańnamalyq turǵyda qamtamasyz etý» taqyryby aıasynda órbidi.
Jıynda Qazaqstannyń Bala quqyqtary jónindegi konvensıa erejelerin oryndaý týraly 4 kezeńdik baıandama týraly da aıtyldy. Ol baıandamany qorǵaý jumysy aǵymdaǵy jyldyń 16-17 qyrkúıeginde Jeneva qalasyndaǵy BUU Balalar quqyqtary boıynsha komıtetiniń 70-shi sesıasynda ótken bolatyn. Dástúrli baspasóz máslıhatyna Ádilet mınıstriniń orynbasary Elvıra Ábilqasymova men Prezıdent janyndaǵy Adam quqyqtary jónindegi komısıa hatshysy Tastemir Ábishev, Joǵarǵy Sot sýdıasy Ǵalıa Aqqýova jáne Ákimshilik polısıa komıteti men Balalardyń quqyn qorǵaý komıtetiniń ókilderi qatysty.
Aldymen sóz alǵan Ádilet mınıstriniń orynbasary Elvıra Ázimqyzy árbir tórt jyl saıyn BUU komıtetinde bala quqynyń qorǵalýy jaıly baıandama jasaýǵa múmkindigi bar ekendigin aıta kele, Qazaqstannyń atalǵan Uıym minberine kóterilýi 2021 jylǵa belgilengendigin atap ótti.
– Ózderińiz biletin shyǵarsyzdar, Qazaqstan delegasıasynyń basshysy retinde elimizdiń Bilim jáne ǵylym vıse-mınıstri Esenǵazy Imanǵalıev BUU komıteti músheleriniń nazaryna engizilgen ózgeristerdi eskere otyryp, balalar quqyǵyn qorǵaý boıynsha júrgizilip jatqan saıasat týraly aqparattardy usyndy. Sondaı-aq, ol qatysýshylarǵa Úkimet tarapynan tórt jyl ishinde engizilgen jańa zańnamalar men atqarylǵan praktıkalyq is-sharalar jóninde habarlap, elimizdegi mańyzdy jáne áleýmettik-ekonomıkalyq, qoǵamdyq-saıası baǵyttar salasyndaǵy progresıvti ózgerister boıynsha órbigen jańalyqtar týraly da aıtty. Qaısybir elderdiń múmkindigine qaraı bul tórt jyldyq talap, keıde 6-7 jyldyq merzimmen ózgerip otyrady. Aıtalyq, Qazaqstannyń Balalar quqyqtary boıynsha komıtet sesıasynda alǵashqy baıandamasy 2003 jyly jasalǵan bolsa, odan keıingisi 2007 jyly jáne aǵymdaǵy jylda tyńdalǵan edi. Al endigi baıandamamyz 2021 jylǵa belgilenip otyr, – dedi ol.
Árıne, álem elderiniń 18 ókilinen turatyn halyqaralyq komıtet aldynda Qazaqstandaǵy bala quqynyń qorǵalýyna qatysty jumystyń atqarylýyn baıandaý bir ǵana – Bilim jáne ǵylym mınıstrliginiń moınyndaǵy mindet emes. Iaǵnı, bizdiń el delegasıasynyń quramynda QR Prezıdenti janyndaǵy Adam quqyqtary jónindegi komısıanyń, QR Adam quqyqtary jónindegi ortalyqtyń, Joǵarǵy Sot, Bas prokýratýra, Syrtqy ister, Ádilet, Densaýlyq saqtaý jáne áleýmettik qorǵaý, Bilim jáne ǵylym, İshki ister mınıstrlikteriniń ókilderi boldy. Nátıjesinde, BUU komıtetiniń músheleri sońǵy jyldar ishinde Qazaqstan Respýblıkasynda júzege asyrylyp jatqan birqatar konvensıalardy keńinen saralap, joǵary baǵalap, elimizdiń halyqaralyq deńgeıdegi bedelin bir satyǵa kóterdi. Al biz mundaı deńgeıge tómendegideı sharýalardy tıanaqty oryndaý arqyly qol jetkizippiz: balalardy halyqaralyq deńgeıde urlaýdyń azamattyq-quqyqtyq tustaryn jetildirý; jumys jasaıtyn erler men áıelderdiń, sondaı-aq otbasylyq mindettemelerge ıe tulǵalardyń teń múmkindikterin jeńildetý jáne múgedekter quqyǵy týraly sekildi qujattardy ratıfıkasıalaý arqyly. Osylaısha, júrgizilip jatqan ońtaıly saıasattyń arqasynda Qazaqstan ekonomıkasy shapshań damyp kele jatqan on eldiń qataryna qosylǵan. Bul óz kezeginde adam basyna shaqqanda jalpy ishki ónimniń ulǵaıýy men el Úkimetiniń bala ómirin qorǵaý salasyna bólinip jatqan qarajatty molaıtýyna zor múmkindikter bergen. Sondaı-aq, qoǵamdaǵy balalar múddelerin qorǵaýǵa baǵyttalǵan jańa ulttyq baǵdarlamalar sátti júzege asyrylyp jatqandyǵyn da umyt qaldyrýǵa bolmaıdy.
Brıfıń barysynda BAQ ókilderi tarapynan ádettegideı san túrli saýaldar qoıylyp, qoǵamda kámelettik jasqa tolmaǵandardyń qatysýymen oryn alyp jatqan keleńsizdikterge tosqaýyl qoıý máselesi de keńinen talqylandy. Bul rette bılik ókilderi tarapynan árbir oryn alǵan oqıǵanyń jaı-japsary muqıat tekserilip, kináliler tıisti jazasyn alatyndyǵy zańmen qamtamasyz etilgendigi de aıtylmaı qalmady.
– Sebebi, memleket bala quqynyń qorǵalýyna qatysty jumys-josparlardy tıisti deńgeıde qolǵa alyp keledi. Tipti, zańnamalyq, sottyq, ákimshilik, áleýmettik jáne basqa da sharalarda ilgerilik tanytyp kele jatqanymyz aıqyn. Jáne bul jaqynda ǵana BUU janyndaǵy Balalar quqyn qorǵaý komıtetiniń 70-shi sesıasynda da óte jaqsy pikir qalyptastyrǵany sezildi, – dedi Prezıdent janyndaǵy Adam quqyqtary jónindegi komıssıanyń hatshysy Tastemir Dáýituly. Jalpy, baspasóz máslıhatynyń sońynda komıtet músheleri Qazaqstannyń qazirgi tańda qol jetkizgen jetistikteri, sondaı-aq, bala quqyqtaryn qorǵaý boıynsha halyqaralyq mindettemelerdi tolyqtaı oryndaýy – qoıylǵan maqsattardyń júzege asyrylǵandyǵyna negiz bola alady dep túıindedi.
Derekkóz: "Egemen Qazaqstan" gazeti
