Qorǵanys mınıstrligi Qarýly kúshterdiń jaýyngerlik daıyndyq baǵdarlamasy sheńberinde 11-19 naýryz aralyǵynda Qaraǵandy oblysynyń aýmaǵynda eki jaqty komandalyq-shtabtyq oqý-jattyǵý ótetinin málimdedi.

Jaýyngerlik daıyndyq is-sharalary kezinde Qaraǵandy, Almaty, Jetisý oblystarynyń aýmaǵynda kúshter men quraldar qozǵalysy júzege aspaq.

Mınıstrlik málimetinshe, oqý-jaýyngerlik mindetterdi pysyqtaý maqsatynda bólimsheler polıgondarǵa temir jol, áýe jáne avtomobıl kóligi arqyly aralas tásilmen marsh jasap, keıin turaqty ornalasý pýnktterine oralady.

Qorǵanys mınıstrligi atalǵan kezeńde óńirdiń jekelegen aýdandarynda shekteý sharalary engizilýi múmkin ekenin habarlap, jurtshylyqty tek resmı aqparatqa senýdi shaqyrdy.

"Osyǵan baılanysty azamattardan ótip jatqan  oqý-jattyǵýlarǵa túsinistikpen qaraýdy jáne tynyshtyq saqtaýdy suraımyz. Sonymen qatar áleýmettik jelilerdi paıdalanýshylardan áskerı tehnıkanyń qozǵalysy týraly jalǵan habarlamalar men beınematerıaldar taratpaýdy jáne tek resmı aqparat kózderine senýdi suraımyz. Esterińizge sala keteıik, qoldanystaǵy zańnamada jalǵan aqparat taratqany úshin qylmystyq jaýapkershilik qarastyrylǵan" delingen mınıstrlik habarlamasynda.