Reseı astanasy Máskeýdegi "Krokýs Sıtı Hol" konsert zalynda bolǵan terakten zardap shekkender sany artyp jatyr.
VVS orys qyzmetiniń málimetinshe, kemi 60 adam qaza taýyp, 145 adam zardap shekken.
22 naýryz kúni Máskeý ýaqytymen 8-den óte "Krokýs Sıtı Hol" zalynda Pıknık tobynyń konserti bastalarda kamýfláj kıgen birneshe adam avtomattan oq jaýdyryp, oqıǵa ornynan izin sýytqan.
Telegram-arnalarda taraǵan aqparatqa qaraǵanda kúdiktiler aq tústi "Reno" kóligimen sytylyp ketken bolýy múmkin. Beıresmı derekterge sáıkes, tegi ıngýsh úsh Reseı azamatyna izdeý jarıalanǵan.
Reseıdiń burynǵy prezıdenti Dmıtrıı Medvedev teraktke Ýkraınany kináláp sóıledi, alaıda Ýkraına taraby birden oqıǵaǵa qatysy joqtyǵyn málimdedi. AQSH ta shabýylǵa Ýkraınany aıyptaýǵa negiz joq dep reaksıa tanytty.
Uzamaı kóptegen elderde lańkestik dep tanylǵan "Islam memleketi" uıymy lańkestik shabýyldy óz moınyna aldy. Alaıda VVS-diń orys qyzmeti aqparatty táýelsiz rastaý qıyn ekenin, atalǵan uıym buryn ózderi qatysy joq oqıǵalardy moınyna alǵan kezder bolǵanyn eske saldy.
7 naýryz kúni AQSH Reseıge 48 saǵattyń ishinde lańkestik shabýyl jasalýy múmkin degen aqparat taratyp, Reseıdegi azamattyryn adam kóp jınalatyn jerge barmaýǵa úndegen.
9 naýryz kúni Reseıdiń FSB qyzmeti Máskeý sınagoga shirkeýine jasalmaq bolǵan shabýyldyń aldyn alǵanyn, arnaıy qyzmetpen atys kezinde eki qazaqstandyq qaza tapqanyn habarlaǵan.
