Reseı Federasıasynan kómek suraǵan Sırıa basshysy búginde Reseı tarapynan zor qoldaý tapty. Orys avıasıasy Sırıa aýmaǵyndaǵy lańkester ornyqqan mekender men oppazıasıa nysandaryna soqqy jasasa, Asad áskerine jerdegi operasıalar úshin áskerı tehnıkamen de qoldaý kórsetýde, - dep habarlaıdy «Qamshy» portaly.
Ótken aptada, Sırıaǵa Reseıden «Solnsepek» (TOS-1) aýyr otty júıesi jetkizilgeni týraly habarlanǵan bolatyn. Kóp uzamaı ǵalamtorda atalǵan qarýdan birneshe eldi-mekenderdiń atqylanǵany túsirilgen vıdeolar paıda boldy. Onda ataqty qarýdan atylǵan snarádtardyń túsken jerin órtep jatqany anyq kórinedi. Áleýmettik jeliler men Reseı aqparat quraldarynda»Solnsepekpen» Damask irgesindegi Djobar, Harast qalalary atqylanǵany aıtylady.
«Solnsepek» TOS-1A júıesi qarsylastyń adam kúshterin jáne jeńil tehnıkasyn joıýǵa arnalǵan. BM-1 jaýyngerlik mashınasyna 24 baǵyttaǵy basqarylmaıtyn reaktıvti snarádtarmen jabdyqtalǵan. Bul júıe qoldanylatyn snarádtardyń ereksheligine qaraı 3,6 shaqyrymnan 6 shaqyrymǵa deıingi qashyqtyqty atqylaýǵa múmkindik beredi. Túsken jerinde 1-2 sharshy shaqyrym aýmaqty órtep jiberedi.
