Prezıdent Qasym-Jomart Toqaev sý tasqyny saldarynan qalyptasqan aýyr jaǵdaıǵa baılanysty úndeýi jarıalady.
Prezıdent qardyń kúrt erýinen qalyptasqan kúrdeli jaǵdaı kólemi jaǵynan sońǵy 80 jyldan bergi eń iri tabıǵı apat ekenin aıtty.
Memleket basshysy sý tasqynyna baılanysty eldiń on aımaǵynda tótenshe jaǵdaı jarıalanǵanyn atap ótti. Olar: Abaı, Aqmola, Aqtóbe, Atyraý, Batys Qazaqstan, Qaraǵandy, Qostanaı, Pavlodar, Soltústik Qazaqstan jáne Ulytaý oblystary.
– Biz alapat sý tasqynynan tıisti qorytyndy shyǵarýymyz kerek. Iaǵnı, jiberilgen olqylyqtardy túzetip, tıisti sabaq alýymyz qajet. Al ondaı sabaqtar az emes.
Apattardyń aldyn alý jumysyndaǵy kemshilikten bastap, sý sharýashylyǵy mamandarynyń tapshy bolýy, tabıǵatqa nemquraıly qaraýǵa deıin kóp máseleni retteý qajet. Úkimet jáne jergilikti atqarýshy organdar sý tasqynymen kúresti tıimdi úılestirip otyrýǵa tıis. Sý basqan aýmaqtarda quqyqtyq tártipti qamtamasyz etý qajet.
Meniń buıryǵymmen apatqa qarsy kúreske Qorǵanys mınıstrligi qosymsha áskerı kúshterin joldaıdy. Halyqqa kómektesý úshin Úkimetke memlekettik materıaldyq rezervti paıdalanýdy tapsyramyn. Sondaı-aq Úkimet shyǵyndardy óteýdiń tıimdi joldaryn shuǵyl qarastyrýǵa tıis. Ony zardap shekken azamattarǵa jan-jaqty túsindirý kerek. Beriletin ótemaqy shyǵyndy tolyq jabýy qajet, – dedi prezıdent.
Memleket basshysy buqaralyq aqparat quraldaryn, belsendi azamattar jáne blogerlerdi jurtty dúrbeleńge salatyn jalǵan aqparattardy taratpaýǵa, azamattardy tek qana resmı aqparat kózderine súıenýge shaqyrdy.
Sondaı-aq qutqarýshylarǵa, tártip saqshylaryna, volonterlerge jáne apatpen kúresýge atsalysyp jatqan barsha jurtqa alǵysyn bildirdi.
Pikir qaldyrý