Kólik mınıstrligi Qazaqstannyń qurlyqtaǵy jeri alda úlkeıýi múmkin ekenin aıtady. Sebebi, Kaspıı teńiziniń túbin tereńdetý boıynsha keń aýqymdy jumystar bastaldy. Onyń barysynda jaǵaǵa orasan zor kólemde topyraq shyǵarylady. El Úkimeti teńiz astynan alynǵan topyraqty paıdalaný arqyly port janynda jańa alańdar quratyn boldy.

Aldyn ala esepterge sáıkes, nátıjesinde elimizde, buryn teńiz bolǵan jerde jalpy aýdany 171 gektardy quraıtyn jańa qurlyq jer paıda bolady.

Kólik mınıstri Marat Qarabaevtyń aıtýynsha, qazirgi kezde Kaspııdegi keme qatynasy qarqyndy ósip keledi, sonymen birge Kaspıı teńizi jaǵalaýynan keri sheginip, qatty taıazdanyp barady. Munyń bári Úkimetke úlken syn bolyp tur. Bul odan navıgasıalyq qaýipsizdik júıesin jedeldetip qurýdy talap etedi. Sondaı-aq ol "Tereńdetý jumystary Kaspıı teńizi deńgeıiniń tómendeýi problemasyn sheship, porttyń termınaldyq qýattaryn odan ári ulǵaıtýǵa múmkindik beredi. Sondaı-aq teńiz túbinen shyǵarylǵan topyraqty paıdalaný arqyly port janynda jańa alań-aımaqtar paıda bolady. Aldyn ala esepterge sáıkes, onyń aýmaǵy 171 gektardy quraıdy", – dep málim etti.