Almaty oblysynyń ákimi Marat Sultanǵazıev Qytaı Halyq Respýblıkasynyń Bas konsýly Szán Veı hanymmen kezdesip, oblys pen Qytaı arasyndaǵy saýda qatynastaryn keńeıtý máselesin talqylady. Bul týraly oblys ákiminiń baspasóz qyzmeti habarlady. 

Marat Sultanǵazıev óz sózinde «Kóljat» jáne «Narynkól» ótkizý beketterin damytý eki el arasyndaǵy taýar aınalymyn nyǵaıtyp, arttyrýǵa zor úles qosatynyn atap ótti.

Jalpy, QHR Qazaqstannyń álemdik ekonomıkalyq derjavadaǵy tikeleı seriktesi. Qytaılyq ınvestorlardyń yqpaldasýymen birshama jobalar júzege asqany málim. Onyń ishinde Almaty oblysynda da birqatar jumystar atqarylǵan edi. Atap aıtsaq, «Kelun-Kazpharm» JSHS farmasevtıkalyq zaýytynyń óndirisi iske qosyldy, «Energıa Semırechá» JSHS jańartylatyn energıa kózderin óndirý jobasy júzege asyryldy, aýyl sharýashylyǵy salasyn damytý aıasynda «Jibek joly» JSHS tamshylatyp sýarý júıesine arnalǵan jıyntyqtaýyshtar, malǵa arnalǵan azyq-túlik qospalaryn óndirý úshin dándi daqyldardy qaıta óńdeý óndirisi jolǵa qoıylǵan edi. 

Aımaq basshysy Marat Eleýsizulynyń aıtýynsha, bul jobalar eki taraptyń ekonomıkalyq damý máselelerindegi tabysty ózara is-qımylyn kórsetedi.

«Qytaıdan kelgen ınvestorlarmen ózara is-qımyl oblystyń ekonomıkalyq damýy úshin mańyzdy bolyp shyqty. Mundaı ınvestısıalar kóbinese jumys kúshiniń biliktiligin arttyratyn jáne jalpy salanyń damýyna yqpal etetin tehnologıalar men bilim transfertin qamtıdy. Qytaımen yntymaqtastyqtyń oń tájirıbesi jańa ınvestısıalar tartýǵa jáne óńir ekonomıkasynyń basqa da sektorlaryn damytýǵa úlgi bola alady», - dedi Marat Sultanǵazıev.

Qazirgi ýaqytta Qytaı Halyq Respýblıkasynyń qatysýymen 11 perspektıvalyq jobany júzege asyrý qarastyrylýda, olardyń ishinde eń irileriniń qatarynda «TVEA» kompanıasynyń transformator zaýytynyń qurylysy, sýarý júıelerin óndirýdi iske qosý jáne «Yulin irrigation» kompanıasynyń traktorlar men aýyl sharýashylyǵy tehnıkasyn qurastyrý zaýytyn salý da bar. 

Búginde óńirde Qytaı Halyq Respýblıkasynyń kásipkerlerimen birlesip jalpy somasy 268 mlrd teńgeden astam 10 joba júzege asyrylýda.

Eske salamyz, Almaty oblysy ınvestısıalyq jobalarǵa baı óńir. Bıylǵy jyldyń mamyr aıynda Almaty oblysynyń ınvestısıalyq qorjynynda jalpy somasy 3,4 trln teńgege jetti.