Almaty ákimi Erbolat Dosaev jumys jospary boıynsha Bostandyq jáne Almaly aýdandaryn aralaý barysynda áleýmettik jáne ınfraqurylymdyq jobalardy júzege asyrý barysymen, aýdandy sýmen jabdyqtaý, mektepterdi jóndeý, qoǵamdyq keńistikterdi kórkeıtý máseleleri boıynsha júrgizilgen sharalarmen tanysty . 

Bostandyq aýdany Markov kóshesindegi jańartylyp jatqan uzyndyǵy 1,2 km qubyr qala ákiminiń nazaryna ilikken ózekti máseleniń biri. Bul jeli 50-shi jyldardyń sońynda paıdalanýǵa berilgen, qazir ábden tozyp, isten shyqqandyqtan, aýdandy sýmen qamtý keznde úlken másele týdyryp otyr. Byltyr bastalǵan jumys merdigerdiń kesirinen keshiktirililgen edi. Sonyń saldarynan merdigerdi jaýapsyz jetkizýshi dep taný týraly talap qoıyldy. 

Erbolat Dosaev nysandy tezirek paıdalanýǵa berýdi jáne qubyr jelisin jańartý kezinde qazylǵan asfált tósemdi qalpyna keltirýdi tapsyrdy. Jańartylǵan qubyr 43 kóppáterli turǵyn úıdi men  aýdannyń 6 ákimshilik ǵımaratyn sapaly sýmen qamtamasyz etýge múmkindik beredi.

Sondaı-aq, Almaly aýdanyndaǵy Volhovskaıa kóshesinde ornalasqan sýmen qamtý stansıasynyń da jaǵdaı máz emes. 32 jyldan astam ýaqyt boıy jóndelmegen nysan apatqa ushyraǵan. Sonyń kesirinen aýdanda sýmen qamtý kezinde úzilis bolyp tur. Máseleni túbegeıli sheshý úshin qala basshysy stansıa jabdyqtaryn aýystyryp, ǵımaratty jóndeýdi tapsyrdy. Apattyq nysandy qalpyna keltirý jumystaryn osy jyldyń maýsym aıynda bastaý josparlanǵan. Stansıa qalpyna keltirilgen soń 4 kópqabatty úıdiń 500-den astam turǵynyn sapaly sýmen qamtamasyz etedi. Aıta keteıik, buǵan deıin aýdanda Áıtıev pen Tóle bı kóshesiniń boıyndaǵy eki sorǵy stansıasy qalpyna keltirildi. 

Qalada bilim berý nysandaryna kúrdeli jóndeý jáne seısmıkalyq kúsheıtý jumystary júrgizilip jatyr. Onyń ishinde 30 jyl buryn salynǵan №70 mektep ǵımaraty bar. 2022 jyly jóndeý jumystary bastalǵan. Biraq merdiger merzimdi buzyp, oǵan aıyppul salynǵan bolatyn. Erbolat Dosaev mekteptiń ishki dızaınyn jasaý kezindegi jiberilgen kemshilikterine zer salyp, mektepti jabdyqtaýǵa erekshe nazar aýdarýdy tapsyrdy. Sondaı-aq, jańa oqý jyly bastalǵanǵa deıin barlyq jumysty aıaqtaýdy tapsyrdy. 

Qazirgi ýaqytta qalada Saıran sý qoımasy aýmaǵyn abattandyrý jalǵasyp jatyr. Qaladaǵy qatty eskirgen ǵımarattar men sáýlet nysandaryn súrý jumystary aıaqtalǵan. Sondaı-aq, aýdanda demalys aımaqtaryn qurý kózdelgen, munda alǵash ret eki jaǵalaýdy baılanystyratyn pontondy ótkelder ornatylyp, lotos otyrǵyzylady. Kógaldandyrýǵa jáne qaýipsizdikti qamtamasyz etýge erekshe nazar aýdarylady. Jańartylǵan jaǵalaý qala turǵyndary men qonaqtary úshin demalys ortalyǵyna aınalatyn bolady. 

Sondaı-aq, Almaly aýdanynda turǵyndardyń ótinishimen tozyǵy jetken nysandardyń ornyna Seıfýllın dańǵyly men Mámetova kóshesiniń qıylysynda aýdany 0,3 ga bolatyn jańa skver salynady. Megapolıs basshysy áleýmettik jaýapkershilik aıasynda ınvestor esebinen júzege asyrylatyn jobany qarap shyqty. Jumys bıyl qazan aıynda bastalatyn bolady. 

Uzaq ýaqyt qaraýsyz qalǵan nysandar da qaıta jańǵyrtylatyn bolady.  Abaı dańǵylynyń boıyndaǵy Turǵyt Ózal kóshesinen Muqanov kóshesine deıingi bólý jolaǵynda jóndeý jumystary 15 jyl buryn júrgizilgen. "Halyq qatysatyn búdjet" jobasy boıynsha munda jaryqtandyrý júıesi, jaıaý júrginshiler aımaǵy jańartylyp, sýarý júıesi ornatylady. Joba osy jyldyń kúzinde júzege aspaq. Erbolat Dosaev qala turǵyndary úshin qolaıly jaǵdaı jasaý úshin sapaly materıaldar men kóshe jıhazdaryn paıdalaný qajettigin atap ótti.

Sonymen qatar, "Halyq qatysatyn búdjet" boıynsha Mámetova kóshesindegi 60 jyl jóndeý kórmegen aýla jóndeldi. Sapar barysynda Almaty ákimi seısmologıalyq baqylaý men zertteýdiń ulttyq ǵylymı ortalyǵyna, №14 jańǵyrtylǵan kitaphanaǵa, ınklúzıvti bilim alý úshin barlyq jaǵdaı jasalǵan Almaty tehnologıalar jáne florıstıka kolejine de bardy.