Aldaǵy ýaqytta Almatydaǵy seısmologıa ǵylymı ortalyǵynyń ǵımaraty jóndelip, qaıta jabdyqtalady. Bul týraly qala ákimi Erbolat Dosaev aıtty. Almaty ákimi TJM Seısmologıalyq baqylaý jáne zertteý ulttyq ǵylymı ortalyǵynyń ǵımaratyna baryp, mekemeniń materıaldyq-tehnıkalyq bazasymen tanysyp qaıtty. 

Almaty qalasy seısmıkalyq turǵyda qaýipti aımaqta ornalasqan. Megapolıste jer silkinisterin zertteıtin Tótenshe jaǵdaılar mınıstrligine qarasty Seısmologıalyq baqylaý jáne zertteý ulttyq ǵylymı ortalyǵy bar. Alaıda onda 1986 jyldan beri kúrdeli jóndeý júrgizilmegen, jabdyqtardyń basym bóligi eskirgen, sondaı-aq kadr tapshylyǵy da oryn alyp otyr.

Ortalyq qyzmetiniń negizgi baǵyty – búkil el aýmaǵynyń seısmıkalyq qaýiptiligin baǵalaý jáne seısmologıalyq monıtorıń júrgizý.

"Biz ǵımaratty qala búdjeti esebinen jóndeý týraly sheshim qabyldadyq. Sondaı-aq ǵylymı zertteýlerge shamamen 2 mlrd teńge bólinedi, bul eńbekaqy tóleý qoryn ulǵaıtýǵa, sheteldik áriptestermen tájirıbe almasýǵa, jańa kadrlar tartýǵa múmkindik beredi. Bul ortalyq qala úshin ǵana emes, búkil el úshin óte mańyzdy, sondyqtan ol álemdik standarttarǵa saı bolýy tıis", – dedi Erbolat Dosaev.

Qazirgi ýaqytta seısmologıalyq baqylaýlardyń Respýblıkalyq jelisi (RSSN) Qazaqstannyń 12 oblysynda jáne Almaty qalasynda ornalasqan 70 seısmıkalyq stansıa men baqylaý pýnkterinen turady.

Stansıalarda 160 túrli ólshem boıynsha seısmıkalyq, geofızıkalyq, gıdrogeologıalyq, baqylaýlar júrgiziledi. Seziletin jer silkinisi jaǵdaıynda kezekshiler jedel rejımde onyń parametrlerin anyqtaıdy: silkinis ýaqyty, epısentrdiń koordınattary, jer silkinisiniń klasy nemese onyń magnıtýdasy.

Aıta keterligi, Ortalyq QR TJM «Seısmologıa ınstıtýty» JSHS men QR TJM «Seısmologıalyq tájirıbelik-ádistemelik ekspedısıa» JSHS-ni biriktirý jolymen qaıta qurý nátıjesinde qurylǵan.