20 qazanda Qaraǵandyda Qazaqstannyń burynǵy Premer-Mınıstri Serik Ahmetovke jáne oblystyq ákimdiktiń eks-sheneýnikterine qatysty qylmystyq is boıynsha kýágerlerdi tyńdaý odan ári jalǵasty. Sot otyrysynda kýáger retinde jaýap bergen «Qazaqstandyq ónerkásiptik korporasıa» JSHS-niń bas dırektorynyń eks-orynbasary Áljan Aqmoldaev Ahmetovterdiń sheteldegi kompanıalarynyń shotyna 2 440 000 AQSH dollary aýdarylǵanyn habarlady. Ol sheteldik kompanıalar men banktiń ataýyn, meken-jaıyn, shottardyń nómirin dálme-dál atap berdi. 

Aıyptalýshylardyń oryndyǵynda otyrǵan Á. Aqmoldaev oqıǵany bylaı túsindirdi: «Serik Ahmetovtiń uly – Danıarmen kóp kezdesýlerimizdiń (óziniń aıtýynsha, ekeýi «Dıplomat» qonaq úıiniń 1-shi qabatyndaǵy holda, «Qazaqstandyq ónerkásiptik korporasıa» JSHS-niń «Kaskad» bıznes ortalyǵyndaǵy keńsesinde jıi-jıi júzdesip júrgen) birinde kishi-Ahmetov meniń qolyma Birikken Arab Ámirlikterinde tirkelgen eki kompanıanyń derektemeleri jazylǵan bir paraq qaǵazdy ustatty. Álgi kompanıalardyń shotyna 4 mln. AQSH dollaryn aýdarýdy ótindi. Alǵashynda ol maǵan aqshany jarty jyldyń ishinde aýdarý qajettigin aıtty. Munsha kólemdegi kóp aqshany tabý úshin, qaryz aldym. Ol úshin 2001 jyldan dostyq qarym-qatynasta bolyp, jaqyn aralasyp júrgen Qaıyrjan Meırambekovten kómek suradym. Estýimshe, sol kezde Q. Meırambekov biraz ýaqyt BAE-de turdy, ózi aýqatty adam bolatyn. Sóıtip, onyń balasy Baýyrjannyń Dýbaıda ótken úılený toıyna bardym. Sol jerde Qaıyrjanmen sóılesip, sheteldegi kompanıalardyń shotyna aqsha aýdarýǵa járdemdesýin ótindim. Ol kelisimin berdi».

Kýáger keıinirek elge oralyp, aqshany qalaı tapqanyn, shetel kompanıalarynyń shotyna qalaı aýdarǵanyn egjeı-tegjeıli áńgimelep berdi. «BAE-terinde tirkelgen «Sal Al-Madına Djeneral Treıdıng» kompanıasyna aqshany «Al Karada Djeneral treıdıng» kompanıasy arqyly aýdardyq. Tórt transhpen aýdarylǵan qarjy «Al Karada Djeneral Treıdıng» arqyly ótti. 2012 jyldyń 1 aqpanynda – 250 myń dollar, 11 aqpanynda – 300 myń dollar, 19 aqpanynda – 200 myń dollar, 25 aqpanynda – 250 myń dollar aqsha aýdaryldy. Odan keıin 2012 jyldyń 4 maýsymynda – 250 myń dollar, 16 jeltoqsanynda – 490 myń dollar, al 2013 jyldyń 13 qańtarynda – 500 myń dollar, 24 naýryzynda – 200 myń dollar jiberildi. Osylaısha, 2012 jyldyń aqpany men 2013 jyldyń naýryzy aralyǵynda S. Ahmetovtiń sheteldik kompanıalarynyń shotyna barlyǵy 2 440 myń AQSH dollar aýdaryldy»,- dedi Áljan Aqmoldaev.

Ol óz sózinde Serik Ahmetov pen bas merdigerdiń (ındýstrıaldyq parktegi ınfraqurylymdy salýǵa jarıalanǵan konkýrsta «QazGerQurylys» birlesken kásiporny jeńiske jetedi) arasynda deldaldyq qyzmet atqarǵan Danıardyń arabtyq eki kompanıanyń arasynda mámile jasalǵanyn rastaý úshin jalǵan kelisim-shart daıyndaýdy tapsyrǵanyn aıtty. Óıtkeni mámileniń jasalǵanyn rastaıtyn dálel bolmaǵan jaǵdaıda banktegi qarajatty paıdalanýǵa múmkindik joq eken. Komersıalyq qurylymdarda kóp jyl jumys istegen Á. Aqmoldaev tyǵyryqtan shyǵatyn jol taýyp, bir kompanıany kartop jetkizýshi etip, ekinshisin ony satyp alýshy etip kórsetedi. Jalǵan mámileniń nátıjesinde 1 300 tonna kartopty (shyndap kelgende eshqandaı kartop satylmaıdy) 650 myń dollarǵa satady. Kýágerdiń ózi S. Ahmetovke ýáde etken 600 mln. teńgeniń 320 mln-nan astamyn ǵana sheteldegi kompanıalardyń shotyna aýdaryp úlgergenin aıtty. Aıtpaqshy, ol óziniń aýqatty dostarynan, tileýlesterinen qaryzǵa alǵan aqshasyn qaıtara almaǵanyn esine alyp, muńyn shaqty.

Ámına BÁKİR