Qazaqtyń mańdaıyna bitken birtýar bylǵary qolǵap sheberi Qanat Islam álemdegi eń myqty kompanıalardyń birimen kelisimshartqa otyrmaqshy eken. Súıinshi jańalyqty    «Habar» telearnasynyń «Kózqaras» baǵdarlamasynda qonaqta bolǵan belgili kásipker Baýyrjan Ospanov málim etti.

            Kesh barysynda qazaq sportynyń birden-bir janashyry Baýyrjan Ospanov Qanat Islam týraly jaǵymdy jańalyǵymen bólisti.

            «Ol - qazaqtyń ultshyl azamaty. Alla taǵala talantty ár qyrynan bere salǵan azamat. Men Qanattyń otbasy, januıasyn jaqsy bilemin. Úlgili otbasynda týǵan, ónegeli azamat. Elim-jerim degende janyn berýge daıyn azamat. Onyń aqyl-oıy, kúsh-qabileti bir emes, birneshe márte álem chempıony bolýǵa jetedi. Sondaı-aq, sol ataqty qorǵap tura alatyn azamat. Ókinishtisi, Qanat elimizge kishkene jaıyraq kelip qaldy. Biraq, onyń jeńisti joldary alda. Búgin aıtpaı tura turaıyn, Qanat Islamnyń aldaǵy básekelerine baılanysty osy 3-4 kúnniń ishinde álemniń eń myqty kompanıalarynyń birimen kelisimshartqa qol qoıylady. Sodan keıin Qanat ári qaraı keminde eki aıda bir ret jarysqa shyǵatyn bolady. Jeńiske bastaıtyn úlken jol ashylady. Kóp uzamaı Qanatpen qaıta qaýyshyp, bir-eki aıda jetistikterin estıtin bolasyzdar», - dep atap ótti. Laıym solaı bolsyn!