Keshe Ortalyq komýnıkasıalar qyzmetinde Májilis depýtattary Vıktor Rogalev pen Serik Seıdýmanov «Eýrazıalyq ekonomıkalyq perspektıva» atty halyqaralyq forýmǵa baılanysty jýrnalıserdiń aldynda ózderiniń oılaryn ortaǵa saldy.

Bul forým Qazaqstan Parla­mentiniń tómengi palatasy men Reseı Memlekettik Dýmasynyń bastamashyldyǵymen ótip otyr, dedi aldymen sóz alǵan Vıktor Rogalev. Qarap otyrsańyzdar, bul – jaqsy qabyldanyp otyrǵan qyzyqty joba. Men onyń birinshi forýmynan bastap qatysyp kele jatyrmyn. Alǵashqy forým Mınsk qalasynda ótken edi. Odan keıin Armenıada, odan ári Reseıdiń Sankt-Peterbýrg qalasynda uıymdastyryldy. Búgin, mine, tórtinshi forým ótip, onda eýrazıalyq ekonomıkalyq damýdyń bolashaqtaǵy perspektıvalary talqylandy. Munda biz toǵyz aı boıy ómir súrip otyrǵan Eýrazıalyq ekonomıkalyq odaqtyń ǵana emes, «Jibek joly» ekonomıkalyq beldeýiniń» de damý perspektıvalary qarastyrylýda. Búgin ol týraly Qytaıdyń ókilderi de, basqalar da óz oılaryn ortaǵa saldy. Jıyrmadan artyq sóılegen sheshenniń arasynda áriptes elder parlamentteri palatalarynyń spıkerleri de boldy. Sonyń ishinde Memdýmanyń tóraǵasy Sergeı Naryshkın, Tájikstan Parlamenti tómengi palatasynyń tóraǵasy Shýkýrdjon Zýhýrovty aıta ketýge bolady.

Osydan ári Vıktor Rogalev osy forýmnyń tikeleı ózin qyzyqtyrǵan jáne oı týǵyzǵan bir jaıttaryna toqtaldy. Sizder bilesizder, bir kezderde óz zamanynyń eń kúshti áskerlerine qolbasshylyq jasaǵan parsynyń Kır patshasy Uly Dalany shaýyp alýǵa kelgen edi. Sol kezde Tomırıs patshanyń tóńiregine shoǵyrlanǵan Uly Dalanyń erjúrek ul-qyzdary jaý­dy jaıratyp salyp, óz jerlerinen qýyp tastaǵan. Bul arasyna syna túspegen birliktiń arqasynda qol jetkizilgen jeńis edi. Muny aıtyp otyrǵan sebebim, osydan 21 jyl buryn Prezıdent Nursultan Nazarbaev Máskeý Memlekettik ýnıversıtetiniń oqytýshylary men stýdentteriniń aldynda sóılegen sózinde túrli saıası jáne ekonomıkalyq shabýyldarǵa qarsy birigý kerektigin aıtqanyn úlken kóregendikke balap otyrmyn. Ol týraly búgingi sózinde osy ýnıversıtettiń rektory Vıktor Sadovnıchıı de atap ótti. Búgingi kúni de tolyp jatqan qaýip-qater­lerge qarsy biz judyryqtaı jumy­lyp, tyǵyz biriksek qana tótep bere alatynymyzǵa kózimiz jetip otyr. Ony forýmda sóılegen she­shenderdiń bári de aıtty, dedi ol.

Serik Seıdýmanov forýmǵa Qazaqstan men Reseı depýtat­tary men sarapshylarynan basqa Armenıa, Belarýs, Qy­taı, Qyrǵyzstan elderi depýtat­tary­nyń delegasıalary men saıasatker, sarapshylar, bıznes-qaýymnyń ókilderi qatysqanyn eske salyp ótti. Sondaı-aq, ol Eýrazıalyq eko­nomıkalyq odaq alqasynyń músheleri de qatysqanyn tilge tıek etti. Forýmda qabyldanǵan qorytyndy qujatta Eýrazıalyq ekonomıkalyq odaq pen «Jibek joly» ekonomıkalyq beldeýiniń» jumystaryn úılestirý týraly sheshim qabyldanypty. Sózin ári qaraı jalǵastyrǵan sheshen Qy­taı Halyq Respýblıkasynyń Tór­aǵasy Sı Szınpın 2013 jyly «Nazarbaev Ýnıversıtette» sóı­legen sózinde usynǵan «Jibek joly» ekonomıkalyq beldeýi» joba­syn Qazaqstan birden qolda­ǵanyn jetkizdi. Búgingi tańda osy baǵyttaǵy naqty jobalar iske asyrylýda, sonyń ishinde uzyn­dyǵy 3 myń shaqyrymǵa jaqyn «Batys Eýropa – Batys Qy­taı» avtomagıstraliniń qazaq­standyq ýchaskesi de bar. Astanada halyqaralyq qarjylyq ortalyq ashý baǵytyndaǵy jumystar da qyzý júrgizilýde. Osy jumys­tar­dyń bári Qazaqstan tarabynyń usynylǵan jobany qatty qoldap jatqandyǵynyń dáleli. Búgingi fo­rýmda sóılegen sózderinde kópte­gen sheshender de osyny aı­typ, Qazaqstan tarapyna jy­ly lebizderin bildirdi. Qazaq­stan Prezıdenti Nursultan Nazarbaevtyń «Nurly Jol» atty ja­ńa ekonomıkalyq baǵdarlamasy da «Jibek joly» ekonomıkalyq bel­deýi» jobasyn damytý jospar­lary­men úılesken. Osy úıles­ti­rilgen jobalar Memleket bas­shy­synyń bes ınstıtýttyq jos­paryn iske asyrýǵa baǵyttalǵan «100 naqty qadam» Ult josparyn oryndaýǵa da óziniń septigin tıgi­ze­tini sózsiz, dedi Serik Seıdýmanov.

Osydan keıin sheshender jýr­nalısterdiń suraqtaryna jaýap berdi.

Derekkóz: egemen Qazaqstan