Qonaev qalasynyń ákimi Asqat Berdihanov bólim basshylarymen birge Sheńgeldi aýyldyq okrýgin aralap shyqty. Bul týraly Qonaev qalasynyń ákimdigi habarlady. 

Eń aldymen ol aýyldaǵy kúrdeli jóndeýdi qajet etetin №2 sorǵy stansıasynyń jolyn kórdi. Aýyl sharýashylyǵy tehnıkalary ary-beri júrip, avtojol jaramsyz kúıge túsken. Qala ákimi jolaýshylar kóligi jáne avtomobıl joldary bóliminiń basshysyna joba jasaýdy, ol daıyn bolǵansha ýaqytsha sheshim tabýdy tapsyrdy.

Asqat Berdihanov barǵan kelesi nysan Qosqudyq aýylyndaǵy eski mektep ǵymaraty boldy. Munda byltyr jańa oqý oshaǵy qoldanysqa berilgen. Endi burynǵy mektepti shaǵyn balabaqsha jasaý kózdelip otyr. Ol úshin ájethana, asqana, jatyn oryn daıyndalyp qoıǵan. Bir ǵana másele – edeni tozyp ketken sport zaldy jóndeý. Shahar basshysy aýyl ákimi Maqsat Jazıevke mektep basshylyǵyna kómektesip, problemany joıýdy tapsyrdy.

Sondaı-aq Asqat Berdihanov bilim ordasynyń ekinshi ǵımaratyn aýyl turǵyndarynyń ıgiligine berý kerek ekenin atap ótti.

«Aýyl halqymen kezdesýde mádenı ortalyqtyń qajettiligi jaıynda suraq kóterildi. Sol úshin ǵımaratty qoldanysqa bereıik. Bilim bóliminen qala ákimdiginiń apparatyna balansqa alaıyq. Shashtaraz, tigin ortalyǵyn asham deıtinder bolsa, olarǵa da kabınet taýyp berý kerek. Jurtshylyqtyń ózin-ózi jumyspen qamtyǵany óte durys», – dedi ákim.

Shahar basshysy nazar aýdarǵan kelesi túıtkil – aýyl tazalyǵy.

«Taza Qazaqstan» ekonaýqany ótip jatyr. Al mekteptiń mańaıy retsiz dúnıege tolyp ketken. Aksıa aıasynda senbilik jasap, eldimekendi qoqystan tazartý kerek», – dep tapsyrma berdi Asqat Berdihanov.

Sodan keıin ákim Aqózek aýylyna bardy. Munda selden qorǵaıtyn eki kópirdiń irgesi otyryp ketken. Jaǵdaıdy kórgen Asqat Berdihanov kópirdi jóndeýden ótkizgen merdiger kompanıany qaıta shaqyrtyp, retke keltirýdi tapsyrdy.