Almaty ákimi Erbolat Dosaev jańa oqý jylyna daıyndyq jáne stýdentterdi jataqhanaǵa ornalastyrý máselesi boıynsha joǵary oqý oryndarynyń rektorlarymen kezdesti. 

"Elimizdiń mańdaıaldy oqý oryndarynyń deni Almatyda ornalasqan, jyl saıyn myńdaǵan stýdent joǵary bilim alý úshin osynda keledi. Bizdiń mindetimiz – olarǵa sapaly bilim berý jáne jaıly jataqhanamen qamtamasyz etý", - dedi qala ákimi Erbolat Dosaev. Qala ákimi jataqhana máselesi tikeleı baqylaýynda ekenin aıtyp, Almatyǵa oqýǵa kelgen stýdentterdiń jaǵdaıyn jasaý boıynsha qabyldanyp jatqan sharalardy talqylady. Sonyń biri – almatylyq stýdentterdi jataqhanaǵa ornalastyrý máselesimen aınalysatyn arnaıy shtabtyń qurylýy. Almaty qalasy ákimdiginiń stýdentterdi qoldaýǵa arnalǵan taǵy bir mańyzdy bastamasy – daǵdarys jáne jedel den qoıý jónindegi ahýaldyq ortalyqtardyń ashylýy. 

Ákimdik ókilderiniń málimdeýinshe, daǵdarys ortalyǵy ALT ýnıversıtetinde ornalasqan. Daǵdarys ortalyǵynyń mindeti – basqa óńirden kelgen baspanasyz stýdentterge jedel qoldaý kórsetý jáne ýaqytsha ornalastyrý. Daǵdarys ortalyǵynda 70 oryn bar. "Ahýaldyq ortalyq Almaly aýdanyndaǵy jastardyń komúnıtı ortalyǵynyń bazasynda jumys isteıdi. 1 tamyzdan bastap ortalyq táýlik boıy jumys istep, stýdentterge ornalastyrý máselesi boıynsha jedel kómek kórsetip jatyr. Ortalyq kún saıyn Qazaqstannyń túkpir-túkpirinen 1,5 myńnan astam qońyraý qabyldaıdy. Sonymen qatar qalanyń árbir joǵary oqý ornynda stýdentterge tikeleı qoldaý kórsetetin ahýaldyq ortalyqtar ashyldy", - delingen vedomstvo habarlamasynda. 

Aıta keteıik, Almatydaǵy 35 joǵary oqý ornynda 199 myńnan astam stýdent bilim alyp jatyr, onyń 124 myńy – ózge óńirden kelgen stýdentter. Qalada 109 stýdenttik jataqhana bar, onda 36,2 myńnan astam stýdent turady. Jalpy qajettilik – 28,7 myń oryn. Qala ákiminiń qoldaýymen qabyldanǵan sharalardyń nátıjesinde tamyz aıynyń sońynda tósek oryn tapshylyǵy 8,9 myń orynǵa deıin qysqarǵan. 

Jataqhana máselesi boıynsha jedel den qoıý jónindegi Ahýaldyq ortalyq – +77002551443, +770095095287