Jandos Búrkitbaev densaýlyq saqtaý vıse-mınıstri qyzmetinen bosatyldy. Bul týraly Úkimet Telegram-daǵy resmı arnasynda málimdedi. 

"Úkimet qaýlysymen Jandos Qonysuly Búrkitbaev bergen ótinishine sáıkes densaýlyq saqtaý vıse-mınıstri qyzmetinen bosatyldy", – delingen habarlamada.

Jandos Búrkitbaev 1971 jyly Jambyl oblysynda dúnıege kelgen.

1996 jyly Asfendıarov atyndaǵy Almaty ulttyq medısına ýnıversıtetin jalpy medısına mamandyǵy boıynsha, 2003 jyly L.Gýmılev atyndaǵy Eýrazıa ulttyq ýnıversıtetin memlekettik jáne jergilikti basqarý mamandyǵy boıynsha, 2007 jyly Ońtústik Qazaqstan memlekettik medısına akademıasyn "Jalpy medısına" mamandyǵy boıynsha, 2018 jyly VSHOZ Qazaqstan medısına ýnıversıtetin bitirgen. 

Jandos Búrkitbaev eńbek jolyn 1996 jyly Almaty qalalyq klınıkalyq jedel járdem aýrýhanasynda jalpy tájirıbelik dáriger bolyp bastady.

Osy jyldar ishinde Almaty qalasyndaǵy respýblıkalyq apattar medısınasy ortalyǵynda dáriger, densaýlyq saqtaý mınıstrliginde bas maman, bólim bastyǵy, áleýmettik máseleler jónindegi komıtettiń qyzmetin qamtamasyz etý basqarmasy bastyǵynyń orynbasary qyzmetterin atqarǵan.

2008 jyly Astanadaǵy qan ortalyǵyn basqardy. 2011-2019 jyldary Transfýzıologıa ǵylymı-óndiristik ortalyǵynyń dırektory boldy.

2019 jyldan bastap densaýlyq saqtaý vıse-mınıstri qyzmetine taǵaıyndalǵanǵa deıin Jandos Búrkitbaev "Ulttyq ǵylymı onkologıalyq ortalyq" JSHS basqarma tóraǵasy qyzmetin atqardy.