Bilim jáne ǵylym mınıstri turǵyndardyń jeke suraqtary boıynsha qabyldaý ótkizdi
«Nur Otan» partıasy respýblıkalyq qoǵamdyq qabyldaýynda Úkimet músheleri azamattarmen jeke kezdesip, olardyń túıitkildi máselelerin sheshýge atsalysýda. Ótken aptada Bilim jáne ǵylym mınıstri Aslan Sárinjipov elimizdegi bilim salasynda oryn alǵan olqylyqtarmen tanysty. Turǵyndar túıtkildi máseleler jónindegi saýaldaryn mınıstrge tikeleı qoıýǵa múmkindik alyp, tipti, onlaın júıesi arqyly Almaty qalasy, Qaraǵandy oblysy, Jambyl oblysy, Ońtústik Qazaqstan oblystary da baılanysqa shyqty.
Bul joly mınıstrdiń qabyldaýyna kirip, aryzyn aıtýǵa nıet bildirgenderdiń qarasy qalyń. Turǵyndardan kelip túsken aryz-shaǵymnyń basym kópshiligi memleket tarapynan bólingen grantqa, JOO-na qabyldaý, arnaıy shákirtaqymen qamtamasyz etý, mektepke deıingi mekemelerde balalarmen jumys júrgizýdi arttyrý, mektepterdegi búdjettiń qysqarýy jáne arnaıy mektepterdiń jabylýy ıa bolmasa qysqarýy sıaqty óz sheshimi tabylmaǵan máselelerdi sóz etpek.
Aslan Sárinjipovpen kezdesýge kelgen Aqmola oblysy Esil aýdanynyń ustazdary aýdandyq bilim bólimi shyǵarǵan buıryq boıynsha óz eńbekterine tólenýi tıis qarajattan qaǵylyp otyrǵandaryn aıtyp, shaǵymdandy. Aýdandaǵy S.Serikov atyndaǵy mekteptiń ustazy Áshken Orazalınanyń aıtýynsha, qazaq tilinen orys synyptaryna beretin 26 saǵatynyń 18 saǵaty úshin ǵana aqsha tólenedi. Bul buıryqty aýdandaǵy bilim bólimi basshysy Samatov Nurlan Májıtuly shyǵarǵan bolyp shyqty. Esepke alynbaǵan saǵattar úshin ár ustaz jalaqysynan 20 myń teńgedeı joǵaltqan. Qabyldaý barysynda mundaı buıryq tek Aqmola oblysy, Esil aýdanynda ǵana berilgendigi anyqtaldy. Ustazdardyń aıtýynsha, respýblıka turmaq, kórshiles aýdandardyń ózinde mundaı buıryq shyqpaǵan. Endi aýdandyq bilim bólimi basshysynyń áreketi saldarynan 300-den astam ustaz az jalaqy alýǵa májbúr bolyp otyr.
Mán-jaıǵa qanyq bolǵan Aslan Sárinjipov bul máseleni tekserý úshin aýdanǵa arnaıy komısıa jiberip, jaýapty aýdannyń bilim bólimi basshylarynan estıtinin jetkizdi. Mınıstrdiń qabyldaýynda bolǵan ustazdar máseleniń aq-qarasy anyqtalatyndyǵyna senimderi mol. Al jalaqy máselesine jeke toqtalǵan bas pedagog jańa jyldan bastap muǵalimderdiń eńbek aqylary ósetindigin aıtty. Mysaly, joǵary sanattaǵy muǵalimderdiń jalaqysy 60 paıyzǵa artpaq. Al Astana qalasynyń turǵyny Dana Bógenbaıqyzy múmkindigi shekteýli balalarǵa arnalǵan mektepke deıingi mekemelerge qabyldaý 4-jastan bastalatyndyǵyna narazy. Sondaı-aq shetelderdegi tájirıbeni negizge alatyn ýaqyttyń jetkendigin, múmkindigi shekteýli balalardyń ásirese daýn sındromyna shaldyqqan balalardyń qoǵamdyq mektepter men balabaqshalarǵa barýyna eshqandaı kederginiń bolmaýy kerektigin tilge tıek etti. Onyń aıtýynsha, naýqas balalarmen qoǵamdyq mekemelerde de jumys júrgizýge bolady. Tek qarjylandyrý máselesin memleket óz qaramaǵyna alsa degen tilegin jetkizdi.
Mınıstrdiń atyna túsken talap-tilekterdiń ishinde mekteptegi úıirmelerdiń, arnaıy mamandandyrylǵan mektepterdiń qarjylandyrý máselesi jıi qozǵaldy. Sonyń bir mysaly, Nadejda Andreevanyń bastaýymen Qaraǵandy qalasyndaǵy №86 orta mektebiniń ujymy uzartylǵan topty saqtap qalý úshin ótinish bildirdi. «Bıylǵy qarasha aıynyń 1-nen bastap bizdiń mektepte uzartylǵan top jabylmaq. Ol jaıly bizge qalalyq bilim berý basqarmasy habarlady. Túrli máselelerge baılanysty ata-analar ózderiniń balalaryn mektepten ýaqytynda alyp kete almaıdy. Biz sizderden mekteptegi uzartylǵan topty saqtap qalýdy suraımyz», – dedi Nadejda Andreeva. Atalǵan máselege Aslan Sárinjipov: «Sizdiń ótinishińiz, mekteptegi uzartylǵan topty qosymsha qarjylandyrý máselesin qarastyrý úshin, Qaraǵandy qalasynyń ákimdigine jiberiletin bolady», ̶ dep jergilikti atqarýshy organdarǵa máseleni ońtaıly sheshýdi tapsyrdy. Aldaǵy ýaqytta qabyldaýǵa kelgen turǵyndardyń, kóterilgen ár túıitkildi máselelerdiń sheshimi tabylyp, mınıstrlik pen tıisti mekemeler birlese jumys júrgizbek.
«Nur Otan» partıasyna qarasty Respýblıkalyq qoǵamdyq qabyldaý bólimi basshylyǵy óz kezeginde úkimet músheleriniń qatysýymen mundaı sharalardyń jalǵasatynyn jetkizdi. «Nur Otan» partıasy respýblıkalyq qoǵamdyq qabyldaý bólimi meńgerýshisi Abylaıhan Ospanov: «Bizde apta saıyn Májilis depýtattary, Úkimet músheleri qabyldaý ótkizedi. Mysaly, osy aıdyń aıaǵyna deıin Baqyt Sultanov, Erbolat Dosaev jáne Berik Imashev azamattardy qabyldaıdy dep josparlanýda. Osyndaı kezdesýler jergilikti fılıaldarda da óz jalǵasyn tappaq. Iaǵnı oblys ákimderi men bólim basshylary turǵyndarmen qabyldaýlar ótkizedi», ̶ deıdi. Aıta keterligi respýblıkalyq qoǵamdyq qabyldaýǵa 9 aıdyń ishinde 65 myńǵa jýyq azamat kelse, onyń 15 myńǵa jýyǵy Májilis depýtattary men mınıstrlerdiń qabyldaýynda bolǵan. Partıanyń tikeleı uıymdastyrýymen bastaý alǵan bul sharanyń jergilikti halyqqa bereri mol. Sońǵy kórsetkish boıynsha respýblıkalyq qoǵamdyq qabyldaýdyń nátıjesinde halyqty jumyspen qamtý máselesi men eńbekaqynyń ýaqytyly tólenýine qatysty birqatar túıitkildi máselelerdiń 20,7 paıyzy óz sheshimin tapqan. Aldaǵy ýaqytta da atalǵan úrdistiń turaqty ótkizilýin, uıymdastyrýyn bas partıa óz baqylaýyna almaq.
Derekkóz: "Jas qazaq" gazeti
