«Eger de adam ıpotekany tóleı almaı qalsa, biz ony balalarymen birge dalaǵa tastamaýymyz kerek, bul bizdiń azamattar emes pe?!» – «Aq jol» partıasynda «Jeke tulǵalardyń bankrottyǵy týraly» zań jobasynyń tanystyrylymy barysynda A.Perýashev osylaı málimdedi.
Burynǵy bolǵan jaǵdaıdy eske túsireıik. 2013 jyldyń jeltoqsan aıynda «Ońaltý jáne bankrottyq týraly» zań jobasyn qaraý barysynda «Aq jol» demokratıalyq partıasynyń jetekshisi oǵan jeke tulǵalardyń bankrottyǵy tártibine qatysty bólimdi qosýdy usyndy.
«Bul tártipti engizý daǵdarys nátıjesinde túrli sebeptermen qatty aýyryp nemese óziniń múmkindikterin esepteı almaı qalyp, bank aldyndaǵy qaryzdaryn tóleı almaıtyn adamdardyń bıshara bolyp ketýine jol bermes edi.
Mundaı azamattardan kepildikte turǵan turǵyn úıin, basqa da múlikti jáne tabysyn alǵan kezde, eń bolmaǵanda, azdaǵan áleýmettik jaǵdaıyn: qandaı da bolsyn baspana, jataqhanadan bólme, balalaryn tamaqpen qamtamasyz etý qajet. Buǵan osyndaı boryshkerlerdi bankrot dep zańdy túrde moıyndaý arqyly jetýge bolady.
Eger de ata-analar qatelesse jáne kináli bolsa, olardyń balalary men qarıalaryn dalada tońdyryp, ash qaldyrýǵa bolmaıdy ǵoı? Bul bizdiń azamattar, bizdiń adamdar» – dep 2013 jyly sóz sóılegen kezde atap ótken Azat Perýashev.
Ókinishke oraı, sol kezde memlekettik organdar jeke tulǵalardyń bankrottyǵyn engizýden bas tartty, soǵan baılanysty «Aq jol» QDP fraksıasy úkimettik zań jobasyn qoldaǵan joq jáne tıisti zańǵa ózdiginen bastamashylyq ete alatynyna daıyn ekeni týraly málimdegen-di.
2014 jyly «Aq jol» demokratıalyq partıasy fraksıanyń depýtattary «Jeke tulǵalardyń bankrottyǵy týraly» zań jobasynyń ázirlenýi men Májilistiń jumys josparyna engizýine qol jetkizdi, sonyń negizinde Parlamenttiń Sharýashylyq Basqarmasy ony daıyndaý úshin zań kompanıasyn jalǵa aldy.
Jýyrda «Aq jol» partıasynyń ortalyq keńsesinde, jobanyń bastamashysy retinde, qujattyń birinshi tanystyrylymy ótti. Otyrysqa qarjylyq sektordyń ókilderi, úleskerlerdiń qoǵamdyq birlestikterdiń birqatary, konkýrstyq basqarýshylardyń qaýymdastyqtary, ádilet mınıstrliginiń sot oryndaýshylary departamentiniń basshylyǵy, «Aq jol» partıasynan Májilis depýtattary keldi. Beınebaılanys konferensıasy rejiminde pikirtalasqa «Aq jol» fılıaldarynan jınalǵan Almatydan, Petropavlden, Aqtóbeden jáne Aqtaýdan jekelgen azamattar men uıymdar qatysty.
Talqylaý barysynda jobany pysyqtaý boıynsha birqatar eleýli eskertpeler aıtyldy. Máselen, bankrottyq, bank qyzmeti, turǵyn úı qatynastary jáne t.b. salalarda qoldanystaǵy zańnamamen joba normalaryn qalyptastyrý qajettiligi kórsetildi. Jeke kásipkerler bolyp tabylatyn, jeke tulǵalardyń bankrottyq prosedýrasyn aıryqsha bólim arqyly kórsetý usynyldy. Jalǵan bankrottyqtyń aldyn alý prosedýralarymen qatar, qaryz berýshi tarapynan qaryz alý sharttarynyń kiriptarlyqqa ushyratatyn jaǵdaılar arqyly bankrottyqqa qasaqana jetkizýdi boldyrmaý jóninde normalardy engizý bastamasy aıtyldy. Sondaı-aq konkýrstyq basqarýshylardyń, nesıe berýshilerdiń keńesiniń, qarjylyq ákimgerlerdiń jáne sot oryndaýshylarynyń jeke tulǵalardyń bankrottyq prosedýralarynda, olardyń áreketteriniń azamattardyń konstıtýsıalyq quqyǵyn buzbaýyn zańdyq turǵydan retteý máseleleri talqylandy.
«Aq jol» tóraǵasy atap ketkendeı, zań jobasy aqjoldyqtar depýtattyq bastama retinde tek osy mańyzdy jáne qıyn máselelerdi sheshken kezde ǵana engiziledi. Dóńgelek ústel aıaqtalysymen, fraksıa depýtattary kezdesýge kelgen ondaǵan ıpotekashylarmen áńgimelesip, qabyldaý júrgizdi.
