2014 jyldyń jeltoqsan aıynda Taraz qalasynyń ońtústik shyǵys betkeıinde Jambyl oblysy júıke aýrýlar ınternat úıiniń jańa ǵımaraty paıdalanýǵa berildi.
 Eń bastysy, ǵımarattyń ishine kirmeı jatyp-aq, esik aldyndaǵy tazalyq pen talapqa saı ornatylǵan pandýstardy kórgen kezde bul mekemeniń qyzmet alýshylaryna barlyq jaǵdaı jasalyp otyrǵanyn bilesiń. Internat úıiniń dırektory Murat Berdalıevtiń aıtýynsha búginde munda turatyn azamattarǵa áleýmettik qyzmet kórsetý salasy boıynsha barlyq jaǵdaılar jasalypty. Qyzmet alýshylardyń jaǵdaıyn jaqsartýǵa, olardy qoǵamǵa tartýǵa, áleýmettik salada psıholog, áleýmettik qyzmet kórsetý mamandary, muǵalim-defektolog, eńbek terapıasy nusqaýshylary, dene shynyqtyrý jáne mýzyka muǵalimderi, mádenı uıymdastyrýshy mamandar aıanbaı eńbek etýde. Júıke aýrýlar ınternat úıiniń ujymy da Taraz qalasynyń qoǵamdyq ómirine belsene qatysyp keledi. Mekeme 2013 jyly júıke aýrýlar ınternat úıleri arasyndaǵy baıqaýda úzdik shyǵyp, «Eń úzdik medısınalyq-áleýmettik mekeme» atalymynda bas júldeni qanjyǵalasa, ótken jyly Almaty qalasynda ótken týrnırde shaǵyn fýtoldan mekemeler arasynda birinshi oryndy ıelendi. Mekemede qyzmet alýshylardyń qolynan shyqqan buıymdar jaqynda ǵana Qazaq handyǵynyń 550 jyldyǵyna oraı uymdastyrylǵan kórmede de top jardy.
– Mekemede shtattyq keste boıynsha 381 adam qyzmet etedi. Qyzmet alýshylardyń sany 500 adamdy quraıdy. Internat úıinde standarttyq 8 baǵyt boıynsha qyzmet kórsetiledi. Olardyń ishinde birinshi baǵyt – áleýmettik-turmystyq, ekinshi baǵyt – áleýmettik-medısınalyq, úshinshi baǵyt – áleýmettik-psıhologıalyq, tórtinshi baǵyt  – áleýmettik-pedagogıkalyq, besinshi baǵyt – áleýmettik-eńbek, altynshy baǵyt – áleýmettik-mádenı, jetinshi baǵyt – áleýmettik-ekonomıkalyq, segizinshi baǵyt – áleýmettik-quqyqtyq. Ár baǵyttyń qyzmet alýshynyń qoǵamdyq ómirge qalyptasýyna tıgizer paıdasy bar. Atap aıtqanda, birinshi baǵyt qyzmet alýshylardyń kúndelikti ómirde tirshilik áreketine kómektesedi. Ekinshi baǵyt qyzmet alýshylardyń densaýlyǵyn jaqsartý jáne qoldaý áreketine baǵyttalǵan. Úshinshi baǵyt qyzmet alýshylardyń qorshaǵan ortaǵa áleýmettik beıimdep, psıhologıalyq jaǵdaı túzeýge kómektesedi. Tórtinshi baǵyt qyzmet alýshylardyń turmystyq daǵdyǵa úıretýge jáne pedagogıkalyq korreksıa men oqýǵa beıimdeıdi. Besinshi baǵyt qyzmet alýshynyń eńbek qabiletin qalyptastyrý jáne eńbekke baýlýǵa, olarǵa jaǵdaı jasaýǵa baǵyttalǵan. Altynshy baǵyt qyzmet alýshyǵa áleýmettik-mádenı sharalardy uıymdastyrý jáne sondaı sharalarǵa tartýǵa negiz bolýda. Jáne jetinshi baǵyt qyzmet alýshynyń turmys jaǵdaıyn jaqsartýǵa baǵyttalsa, segizinshi baǵyt qyzmet alýshynyń quqyqtyq statýsyn demeýge nemese ózgertýge bolmasa olarǵa zańgerlik kómek kórsetýge baǵyttalǵan. Internat úıiniń qyzmetkerleri osynda turatyn naýqastardyń sportpen aınalysýǵa degen yntasyn týǵyzýǵa kómektesip, mádenı-tanymdyq qajet­telik­terin, qyzyǵýshylyqtaryn, suraqtary men qalaýlaryn bildirýge múmkinshilik jasaýda. Sonymen qatar, alǵan bilimderin áleýmettik mańyzdy maqsattarǵa jumsaýǵa úıretedi. Olardyń qyzyǵýshylyǵyn jáne qorshaǵan ortany tanyp-bilýge, shyǵarmashylyq is-áreketterge qatysýǵa, jańa nárseni bilýge degen talpynystaryn qanaǵattandyrý úshin mekemede standartqa saı birneshe úıirmeler jumys isteıdi. Olar – bı, án men mýzykalyq aspaptarda oınaý úıirmeleri men mánerlep oqý toptary. Internat úıiniń turǵyndary ónerdegi jetistikterin nyǵaıtýǵa oblys, qala kólemindegi sharalarǵa, festıváldarǵa qatystyrylýda. Osy jumystardyń nátı­jesinde, ınternatymyz sońǵy úsh jyldyń belesinde ınternat úıleriniń arasynda eń úzdik áleýmettik-medısınalyq mekeme ataǵyn jeńip aldy. Bizdegi turǵyndar shahmat, doıby jarystarynda únemi júlde alyp júr. Jaz aı­larynda (21 shilde men 3 tamyz) Los Andjeles qalasynda ótken arnaıy Olımpıada oıyndarynda el quramasy sapynda qatysyp qaıtqan (el sportshylary 125 medal ıelendi) bizdiń qyzmet alýshymyz Tamara Vasıleva voleıboldan jaqsy oıyn úlgisin kórsetip, álemdik dodada júldeli 5-shi orynnan kórindi. Bul biz úshin úlken mártebe. Sportta, ónerde bolsyn nemese basqa da eńbek terapıasy is-sharalarynda bolsyn mundaǵy múgedek jandar nusqaýshylardyń kómegimen qolónermen, gúl, tal, jemis aǵashtaryn egip-ósirýmen aı­nalysady. Múmkindigi shekteýli jandardyń qoljetimdiligin arttyrý maqsatynda barlyq jatyn bólmeler talapqa saı jabdyqtalyp, qolarba júretin jerler men pandýstar standartqa sáıkestendirilgen. Taǵy bir aıta keterligi, búgingi kúni qyzmet alýshylardy ınternat úıinde jeńildetilgen túrde, ıaǵnı sottyń sheshiminsiz ornalastyra alamyz. Buryndary sottyń sheshimi mindetti túrde suralyp kelse, qazir onyń asa qajettiligi joq, – deıdi Ulttyq Medısına qaýymdastyǵynyń Jambyl oblysy boıynsha prezıdenti, «Altyn dáriger» jáne «Áleýmettik sala qyzmetkerleriniń úzdigi» tósbelgileriniń ıegeri, bilikti basshy, tájirıbeli dáriger Murat Ázimhanuly.
Rasynda, úsh qabatty jańa ǵımaratta qyzmet alýshylarǵa bar jaǵdaı jasalǵan. Internat úıin dırektordyń áleýmettik sala boıynsha orynbasary Saltanat Jantaeva men medısına bóliminiń meńgerýshisi Anarhan Djýnýsalıevanyń jol bastaýyman aralap shyqqanymyzda oǵan kózimiz jete tústi. «Meıirim», «Qarlyǵash», «Úmit», «Shapaǵat», «İzgilik», Aqnıet, «Janshýaq», «Oqshaýlaý» dep atalatyn segiz bólimdegi tyndyrymdy ister menmundalap-aq tur. Kóńildi osyndaǵy jarymjan jandarǵa jasalyp jatqan jaqsylyqtar tolqytty. «Oqshaýlaý» bóliminde ınternat úıine jańadan túsken qyzmet alýshyǵa standartqa saı 14 kúndik baqylaý júrgiziledi eken. «Úmit» bóliminde qolarbaǵa tańylǵan 18 qyzmet alýshyǵa jeke palatalar qaras­tyrylyp, olar úshin syrtqa shyǵatyn esik jáne syrtta pandýs jasalǵan.
Qalaı degende de, júıke aýrýlar ınternat úıindegi turǵyndar bastaryna túsken taǵdyr talqysyna moıymaı, barlyq mádenı sharalarǵa atsalysyp, ózge de ınternat úılerindegi jandarǵa qaıyrymdylyq konsertterin berip belsendilik tanytýda.