Lıvannyń ártúrli aımaqtarynda peıdjerler men rasıalardyń jarylysynan qaza tapqandar sany 37 adamǵa jetti. Bul týraly Anadoly agenttigi habarlady.

Lıvannyń densaýlyq saqtaý mınıstri Fıras ál-Ebád baspasóz máslıhatynda 19 qyrkúıek sársenbide rasıalar jarylysy saldarynan qaza tapqandar men jaralanǵandar sanynyń sáıkesinshe 25 jáne 608-ge jetkenin aıtty.

Ebád jaraqat alǵan 61 adam reanımasıada jatqanyn jáne olardyń jaǵdaıy aýyr ekenin atap ótti.

Mınıstr seısenbi, qyrkúıektiń 17-si kúni Lıvanda «Hezbolla» músheleri paıdalanǵan peıdjerlerdiń bir mezgilde jarylýynan 12 adamnyń qaza tapqanyn eske saldy. Onyń aıtýynsha, bul shabýyl saldarynan zardap shekkenderdiń sany 2323 adam bolsa, onyń 1343-i ortasha jáne aýyr jaraqat alǵan.

Seısenbi kúngi eldegi jarylystardan zardap shekkender sanynyń azaıýy, keıbiriniń birneshe aýrýhanaǵa baryp, tirkeýde turýymen baılanysty. Mınıstr jaralanǵandardyń 955-ine ota jasalǵanyn, olardyń 226-sy áli jansaqtaý bóliminde jatqanyn aıtty.

Ebád rasıalardyń jarylýy peıdjerlerdiń jarylystarynan góri kóbirek ólimge ákelgenin atap ótti.

«Hezbolla» óz kezeginde Lıvannyń ártúrli bólikterindegi ICOM rasıalarynyń jarylysynan onyń 26 múshesi qaza tapqanyn habarlady.