Alataý qalasynyń bilim bólimi 1 qazanda jergilikti memlekettik organdar ókilderi №1 jáne №47 mektepteriniń ustazdar ujymdarymen kezdeskenin habarlady. Muǵalimder jalaqynyń ákimshilik-aýmaqtyq qurylymnyń ózgerýine baılanysty qysqarýyna alańdaýshylyq bildirdi.
Habarlamada 2024 jyldyń 9 qańtarynan bastap Alataý qalasyna Qonaev qalasy, İle jáne Talǵar aýdandarynyń burynǵy quramyna kirgen birqatar eldi mekender qosylǵany aıtylǵan. Osyǵan oraı qoldanystaǵy zańnamaǵa sáıkes, osy aýmaqtarda turatyn búdjet salasy qyzmetkerleriniń eńbekaqy tóleý júıesinde ózgerister bolǵany atap ótildi.
"Týyndaǵan máselelerdi jan-jaqty qarastyrý maqsatynda kezdesýge Alataý qalasy ákiminiń orynbasary, qalalyq bilim bóliminiń basshysy, sondaı-aq oblystyq bilim jáne ishki saıasat basqarmalarynyń ókilderi shaqyryldy. Konstrýktıvti dıalog barysynda eńbekaqy máseleleri ǵana emes, turǵyndar úshin ómirlik mańyzdy taqyryptar: kólikpen qamtamasyz etý, qoqys shyǵarý, gazdandyrý máseleleri de talqylandy", – delingen habarlamada.
Bilim bólimi kezdesýdiń nátıjesinde muǵalimder ujymdarymen ózara túsinistikke qol jetkizilgenin málimdedi.
