«Órleý» BAUO» AQ fılıaly Almaty oblysy boıynsha pedagog qyzmetkerlerdiń biliktiligin arttyrý ınstıtýty men Almaty oblysynyń İle, Qarasaı, Talǵar, Jambyl aýdandaryndaǵy eksperımenttik alań retinde bekitilgen bilim berý uıymdarymen Ózara Yntymaqtastyq Memorandýmyna qol qoıý resmı saltanaty bolyp ótti.
«Búgingideı jahandaný jaǵdaıynda memleket men adam ozyq, básekege saı bolýy úshin, eń birinshi bilim men ǵylym órkendeýi qajet»,- dep Elbasymyz N.Á. Nazarbaev aıtyp ótkendeı, qazirgi tańda bilim men ǵylym salasyn damytý basty nazarda. Básekege qabiletti bilimdi urpaq tárbıeleý isi ustazdarǵa júkteler jaýapkershilik júgin eseleıdi. Sondyqtan da, ustazdar ár ýaqyt zaman talabyna saı bilimi men biliktiligin jetildirip otyrýy shart. Osy maqsatta «Órleý» BAUO» AQ fılıaly Almaty oblysy boıynsha pedagog qyzmetkerlerdiń biliktiligin arttyrý ınstıtýty Almaty oblysynyń İle, Qarasaı, Talǵar, Jambyl aýdandaryndaǵy bilim berý mekemelerimen ózara kelimge qol qoıdy.
«Bilim berý uıymdaryndaǵy oqý-tárbıe úderisine ınovasıalyq tehnologıalardy endirý, pedagog qyzmetkerlerdiń kásibı quzyrettiligin qalyptastyrýǵa baǵyttalǵan is-sharalardy júzege asyrý, jastar arasynda oqý-tárbıe úderisimen ózara tyǵyz baılanystaǵy birlesken ǵylymı jobalardy Almaty oblysynyń aımaǵynda ótkizý, ınovasıalyq ozyq is-tájirıbelerdi taratý jumystaryn birlese uıymdastyrý t.b. bilim jáne ǵylym salasyndaǵy birlesken jobalardy iske asyrý úshin zańdy túrde qarym-qatynysymyzdy bekitý qajet degen baılamǵa keldik»,- dep ınstıtýt dırektory Dúsebaev Hanat Álimjanuly Memorandýmnyń mańyzy men mánine toqtalyp ótti.
Ózara Yntymaqtastyq Memorandýmyna Almaty oblysy bilim basqarmasy, Jambyl, Qarasaı, İle, Talǵar aýdany bilim bólimi basshylary, M.Beısebaev atyndaǵy «Talǵar agrobıznes jáne menedjment koleji memlekettik komýnaldyq qazynalyq kásiporny» dırektory, «№7 Aıgólek bóbekjaı-balabaqshasy» meńgerýshisi jáne joǵaryda atalǵan aýdandarǵa qarasty 14 mektep dırektory qol qoıyp, birlese jumys atqarýǵa daıyn ekendikterin jáne áriptestikke zor úmit artatyndyqtaryn jetkizdi.
Almaty oblystyq bilim basqarmasynyń ádistemelik kabınetindegi Inovasıa jáne orta bilim bóliminiń jetekshisi Sapargalıeva Sherızat Tólegenqyzy: «Almaty oblystyq bilim berý uıymdarynyń ózara yntymaqtastyqta jumys jasaýy bilim berý salasynyń órkendeýine qosar úlesi zor», — dep óz pikirin bildirdi.
Ózara Yntymaqtastyq Memorandýmyna qol qoıylyp, mándi ótken basqosý barysynda bilim berý salasyn ilgeriletýge baılanysty mańyzdy oılar aıtyldy, bolashaqqa baǵdarlanǵan jańa josparlar talqylandy.
Derekkóz: "Túrkistan" gazeti
