Tarazda ótip jatqan Qazaq handyǵynyń 550 jyldyǵyna arnalǵan merekelik sharalar jalǵasyn tapty.
 Sonyń negizgileri retinde «Nur Otan» partıasynyń tikeleı qoldaýymen Máńgilik el aqyndar aıtysy jáne halyqaralyq «Eýrazıa Barysy» týrnıri boldy. Osy oraıda biz «Nur Otan» partıasy Tóraǵasy birinshi orynbasarynyń keńesshisi Berik Ýálımen suhbattasyp, Qazaq Handyǵynyń 550 jyldyǵyna arnalǵan is-sharalardyń mańyzdylyǵy týraly suradyq. 
– Berik Qurmanǵalıuly, Taraz tórinde ótip jatqan halyqaralyq aqyndar aıty­synyń shymyldyǵyn ózińiz ashyp berdińiz. Mundaı sharanyń Taraz shaharynda ótýiniń de bir máni bar shyǵar?
– Árıne, bul sharanyń Tarazda ótýiniń ózi tarıhı mán-maǵynaǵa ıe. Sebebi Shý men Qozybasy óńiri Uly dalany aq naızanyń ushymen, aq bilektiń kúshimen qorǵap, bizderge amanat etken babalary­myzdyń alǵash tý tikken jeri ekeni barsha­ńyzǵa aıan.  Memlekettigimizge negiz bolǵan osynaý tarıhı oqıǵaǵa 550 jyl tolýyn bıylǵy jyly Elbasynyń bas bolýymen barsha el bolyp, keń kólemde atap ótýdemiz. Sondaı sharalardyń biri – osy aqyndar aıtysy. Bul aqyndar dodasyna elimizdiń túkpir-túkpirinen jáne kórshi Qytaı, Mońǵolıa elderinen kelgen 26 júırik aqyn qatysty. 
– Jasyratyny joq, Elbasynyń qamqor­lyǵynyń arqasynda aıtys óneri jańa beleske kóterildi. Aıtys buqara men bılik arasyndaǵy altyn kópir boldy desek te qatelespeıtin shyǵarmyz. 
– Árıne, tól ónerimiz memlekettiń qam­qorlyǵymen damý bıigine kóterilip, elge rýh beretin, yntymaǵyn nyǵaıtatyn, son­daı-aq áleýmettiń kókeıkesti máselelerin ashyq aıtyp, onyń sheshilýine yqpal ete alatyn tetikke aınaldy. Táýelsiz el bolǵan 24 jyl boıy jer-jerde uıymdastyrylǵan úlkendi-kishili aıtys eldigimizdi, birligimizdi jyrlady. Qazaqtyń aıtys ónerine, ulttyq sportyna, basqa da rýhanı sharalarǵa júıeli qoldaý kórsetý – «Nur Otannyń» eli úshin atqarar qyzmetiniń ajyramas bóligi. «Nur Otan» úshin aıtysty qoldaý – ulttyq ónerge qamqorlyqpen qatar, halqymyzdyń muń-muqtajynan tikeleı aqparat alýdyń, elge jaqyn bolýdyń joly. 
– Bul jolǵy aıtystyń taqyryby, Máńgilik el taqyrybynda órbidi. Qalaı oılaısyz, aıtyskerlerimiz osy zor taqyryptyń aıasyn asha aldy ma? 
– Iá, aıtystyń taqyryby sonaý Tonykókten beri kele jatqan, Elbasy sarabdal saıasatyna ózek etken – Máńgilik el ıdeıasy. Sondyqtan da aqyndarymyz elimizdi álemge tanytqan jasampaz isterdiń baıandy bolýyn jyrlaryna arqaý etti. Sóz maıtalmandary eki kún boıy ónersúıer qaýymdy rýhty jyrymen sýsyndatyp, eldigimizdi, babalarymyzdyń teńdessiz erligin, táýelsizdikti jyrlady. «Nur Otan» partıa­synyń qoldaýymen uıymdas­tyrylǵan búgingi halyqaralyq aıtys – Qazaq handyǵynyń 550 jyl­dyǵyna arnalyp, jer-jerde ót­kizilgen aqyndar dodasynyń qory­tyndysy boldy. 
– Sonymen qatar Tarazda «Eýrazıa barysy» halyqaralyq týrnıri ótti. Bul sharaǵa da «Nur Otan» qoldaý bildirdi. Jetekshi partıanyń qazaq kúresiniń jana­shyryna aınalǵanyn eldikti, patrıotızmdi qalyp­tastyrýǵa arnalǵan qadam dep túsinýge bolady eken.
– Halqymyzdyń óneri men mádenıe­tin, rýhanıatyn qoldaýdy óziniń saıası doktrınasynda basymdyq retinde belgilegen «Nur Otan» partıasy jańa qazaqstandyq patrıotızmdi qalyptastyrý baǵytynda júıeli jumystardy qolǵa alýda. Osy oraıda partıa birneshe jyldan beri qazaq kúresinen Elbasy júldesi úshin bolatyn «Qazaqstan Barysy» jobasyna qoldaý kórsetip keledi. Búginde qazaq kúresi Qazaqstandaǵy eń tanymal ári jurt jappaı aınalysatyn sport túrine aınaldy. 2011 jyldan bastap bıylǵy jylǵa deıin onymen shuǵyldanýshylar sany eki esege artyp, 120 myń adamǵa jetti. Jobanyń televızıalyq aý­dıtorıasynyń jıyntyq kórsetkishi shamamen 1,3 mıllıard adamdy qurady. Sonymen birge týrnır álemniń 126-dan astam eline tikeleı translásıa­lanady. Osynaý jobanyń arqasynda ulttyq kúres elimizde ǵana emes, syrt elderde de, atap aıtqanda, Lıtva, Polsha, Estonıa, Reseı, Grekıa, Túrkıa, Iran, Ulybrıta­nıa sıaqty memleketterde de qanatyn jaıa bastady. Qazirgi kúni qazaq kúresin olımpıadalyq sport túrleri tizimine qosý jóninde is-qımyldar qolǵa alynyp jatqany da kóńilge qýanysh uıalatady. 
– Ras, «Qazaqstan Barysy» jobasy qazaq kúresiniń atyn jahanǵa jaıyp, elimizdiń ulttyq brendine aınaldy. Bolashaqta da osy baǵytynan taımaýyn tileımiz! 
– Bıylǵy jyly elordada Astana kúni qarsańynda «Qazaqstan Barysynyń» 5-mereıtoılyq týrnıri ótti. Ata zańymyz ben Qazaqstan halqy assam­bleıasynyń 20 jyldyǵy jáne Qazaq handyǵynyń 550 jyldyǵy sıaqty aıtýly merekelerge arnalǵan dúbirli dodaǵa Elbasynyń ózi qatysýy jobanyń mańyzdylyǵyn odan ári arttyra tústi. 2013 jyldan beri halyq­a­ralyq «Eýrazıa Barysy» týrnırin ót­kizýdiń arqasynda «Qazaqstan Barysy» elimizdiń brendine aınaldy dese de bo­la­dy. Osynaý sharalardy qolǵa alýdaǵy bas­ty maqsat – ultqa ortaq qun­dylyq­tar­dy júzege asyra otyryp, Elbasy usynǵan Halyqtyq 5 reformada aıtyl­ǵandaı, bolashaǵy birtutas, jasampaz ulttyń negizin qalyptastyrý, Máńgilik elge kósh túzeý. Sol sebepti osy jobany uıym­das­tyrýdyń basy-qasynda júrgen azamat­tarǵa úlken alǵys bil­diremin.

Derekkóz: Aıqyn-aqparat