Keshe Prezıdent janyndaǵy Ortalyq komýnıkasıalar qyzmetinde Bilim jáne ǵylym vıse-mınıstri Tahır Balyqbaevtyń qatysýymen «Qazaqstan-2020: bolashaqqa jol» memlekettik jastar saıasatynyń 2020 jylǵa deıingi tujyrymdamasynyń birinshi kezeńin iske asyrýdy qorytyndylaý jóninde brıfıń ótti.
«Búginde elimizdiń ár tórtinshi turǵyny 29-dan jas, olardyń ishinde qala jastary – 2,5 mln., aýyldyqtar – 1,9 mln. 2013 jyldyń qorytyndylary boıynsha Jastar damýynyń álemdik ındeksinde Qazaqstan álemniń 170 eli arasynda 27-oryndy ıelendi, bul Fransıa, Túrkıa jáne Shvesıa sıaqty tabys deńgeıi anaǵurlym joǵary kóp­te­gen elderge qaraǵanda joǵary», – dedi vıse-mınıstr.
Qazaqstan jastarynyń odan ári damýy úshin Memlekettik jastar saıasatynyń 2020 jylǵa deıingi «Qazaqstan-2020: bo­lashaqqa bastar jol» tujyrymdamasy qabyldandy. Jospardy iske asyrý eki kezeńge bólingen: 2013-2015 jyldar jáne 2015-2020 jyldar aralyǵy.
«Qazirgi tańda belgili bir nátıjelerge qol jetkizilgeni anyq. Jastar ara­syn­daǵy jumyssyzdar sanynyń 3,5 myń adamǵa azaıýyn memlekettik organdar birlesken jumysynyń nátıjesi deýge boldy. 29 jasqa deıingi jas ákimderdiń sany 19,5%-ǵa ósti – olar 143 boldy», – dep qosty T.Balyqbaev.
Búginde Bilim jáne ǵylym mınıstrligi Tujyrymdamanyń ekinshi kezeńin iske asyrýǵa daıyndalyp jatyr eken. İs-sharalar josparynyń jobasyna 100-ge jýyq tarmaqty qamtıtyn 10 bólim kiredi.
«Kelesi kezeńniń maqsaty jas­tar­dyń tabysty áleýmettenýine, olardyń áleýetin «Máńgilik El» qun­dylyqtary negizinde eldiń ári qaraı damýyna baǵyttalǵan memlekettik jas­tar saıasatynyń tıimdi úlgisin qalyp­tastyrýdy aıaqtaý bolyp tabylady», – dedi spıker.
Sondaı-aq, atalǵan taqyryp sheń­berinde «Nur Otan» partıasynyń «Jas Otan» jastar qanatynyń tóraǵasy Shahmardan Baımanov: «Bul joba Elbasy Nursultan Nazarbaevtyń tapsyrmasymen iske qosyldy. Basty maqsaty – partıalyq jáne memlekettik qyzmet úshin kásipqoılar tobyn qalyptastyrý. Jobany iske asyrýdy taldaý brendtiń tanymaldylyǵyn, jastar arasynda jáne BAQ-tarda senimdiligi men tanymaldylyǵyn kórsetedi. Jalpy, alty jyl ishinde jobaǵa on myńnan astam jas maman qatysty», – dedi.
Belgili bolǵandaı, jyl saıynǵy ashyq baıqaýdyń qorytyndylary boıyn­sha 400-ge jýyq rezervısen baza qurylypty.
Tujyrymdamanyń jańa kezeńi aıasynda negizgi júıelik aspektiler boıynsha jumysty jalǵastyrý josparlanyp otyrǵany belgili. Bul kezde ádistemelik bazany jetildirýge jáne jastarmen jumys jasaıtyn mamandardyń daıarlyq deńgeıin arttyrýǵa basty nazar aýdarylady.
Sondaı-aq, mınıstrlik ókilderi Tujyrymdamany iske asyrýdyń birin­shi kezeńi (2013-2015 jyldar) aıasynda ortalyq jáne jergilikti atqarýshy organ­dardyń quzyretteri men jaýapkershilik aımaǵyn aıqyndaýshy vedomstvoaralyq qarym-qatynastyń tıimdi modeli qalyptasqandyǵyn atap ótti. Ortalyq memlekettik organdardyń strategıalyq josparlary men aımaqtardy damytý baǵdarlamalaryna memlekettik jas­tar saıasatyn júzege asyrý jónindegi kórsetkishter engizildi. Sonymen birge, aımaqtardy damytý baǵdarlamalaryna jastarmen jumys júrgizý boıynsha kórsetkishteri de engizilgen.
2015 jylǵy aqpanda «Memlekettik jas­tar saıasaty týraly» Zań qabyldandy. Zańda memlekettik jastar saıasaty aıa­syndaǵy bilim, ǵylym, densaýlyq saqtaý, eńbek, kásipkerlik, mádenıet, deneshynyqtyrý jáne sport, dinı qyz­met, ishki ister organdary, qorǵanys, qorsha­ǵan ortany qorǵaý jáne buqaralyq aqpa­rat quraldary salalaryndaǵy orta­lyq memlekettik organdardyń quzy­retteri jiktelgen.
Ortalyq jáne jergilikti deńgeıde barlyq sanattaǵy azamattarǵa, sonyń ishinde jastarǵa baǵyttalǵan jobalarǵa áleýmettik tapsyrystardy ornatýdyń salalyq qaǵıdaty belsendi qoldanylýda. 2015 jyly jastar ortalyqtarymen ózara jumys júrgizý maqsatynda res­pýb­lıkalyq búdjetten 1 094,07 mln. teńge, jergilikti búdjetten 4 256,1 mln. teńge qarjy bólindi.
Sonymen qatar, memleket pen jas­tar arasynda qarym-qatynas júrgizý tásilderin jaqsartý úshin qurylǵan konsýltasıalyq — keńesshi organdardyń róli kúsheıtildi. Prezıdent pen ákim­dik­ter janyndaǵy Jastar saıasaty jónin­degi keńesterdiń, BǴM janyndaǵy Jastar uıymdaryn damytý boıynsha úıles­tirý keńesiniń mártebeleri zańdy túrde bekitildi.
Qazirgi tańda Memlekettik jastar saıa­satynyń 2020 jylǵa deıingi tujyrym­damasynyń II kezeńiniń (2016-2020) jobasy daıyndalyp, ortalyq jáne jer­gilikti memlekettik organdarmen kelisý úderisteri júrýde. Ekinshi kezeń barysynda óskeleń urpaqty patrıot­tyq rýhta tárbıeleý jáne balalar men jasóspirimderdiń qozǵalysyn damytý jónindegi tujyrymdamany bekitý ju­mys­taryna basa kóńil bólinetin bolady.

Derekkóz: Egemen Qazaqstan