ASTANA. QazAqparat - Almaty oblysy Jambyl aýdany Qaraqystaq aýylynda jyr súleıi Súıinbaı Aronulynyń 200 jyldyq mereıtoıyna oraı aqynnyń eskertkishi men saıabaǵy ashyldy. Bul týraly Almaty oblysy ákiminiń baspasóz qyzmetinen habarlady.
Tórt kúnge sozylǵan aqynnyń dúbirli toıynyń qorytyndysy ispettes aıtýly sharaǵa elimizdiń zıaly qaýym ókilderi, ǵalymdar, Parlament depýtattary, sonymen qatar Jambyl jáne Ońtústik Qazaqstan oblystarynyń, Túrkıa memleketiniń ókilderi arnaıy keldi.
Qonaqtar aldymen sóz súleıiniń kesenesinde bolyp, rýhyna taǵzym etti. Munan soń aqynnyń bıylǵy jyly kúrdeli jóndeýden ótip, jańaryp-jańǵyrǵan murajaıyna atbasyn tirep, jádigerlermen tanysty.
Sondaı-aq osy kúni jańadan ashylǵan saıabaqtyń ishinde ornatylǵan búst kópshiliktiń kózaıymyna aınaldy.
Mereıtoıdyń alǵashqy quttyqtaý sózi Almaty oblysynyń ákimi Amandyq Batalovqa berildi. Óńir basshysy óz sózinde aqynnyń murasyn qasterlep, urpaqqa jetkizý baǵytynda atqarylǵan ıgilikti isterdi atap ótip, jınalǵan qaýymdy torqaly toılarymen quttyqtady. Aqyn murajaıyna kóliktiń kiltin tabystap, «Súıinbaı sazy» halyqtyq fólklorlyq-etnografıalyq ansambline jaqyn kúnderde avtobýs alynyp beriletinin de jetkizdi. Sonymen qatar kórnekti ǵalym, ádebıet zertteýshisi Sultanǵalı Sadyrbaevtyń Súıinbaıtaný baǵytyndaǵy eńbegin atap ótip, ǵalymnyń jubaıy Zúken Keńshilikqyzyna syı-sıapat kórsetti.
Munan soń sóz alǵan QR Mádenıet jáne sport mınıstri Arystanbek Muhamedıuly, Halyqaralyq TÚRKSOI uıymynyń bas hatshysy Dúısen Qaseıinov, QR Parlamenti Senatynyń depýtaty, Jazýshylar odaǵynyń Basqarma tóraǵasy Nurlan Orazalın, profesor ǵalym Tólegen Qojamqulov, Jambyl oblysy ákiminiń orynbasary Erqanat Manjýovtar Súıinbaıdyń aqyndyǵyn, qaıratkerlik qyryn tilge tıek etip, bul toı kúlli qazaqtyń rýhanıatynyń toıy ekenin aıtty.
Al Eýrazıa Jazýshylar odaǵynyń tóraǵasy Iakýp Omaruly: «Bóri - tek qazaq halqynyń ǵana emes, kúlli túrki halyqtarynyń sımvoly, endeshe Súıinbaı jyrlaǵan «Bórili baıraq», Súıinbaı aqyn shaqyrǵan bereke-birlik barsha túrki jurtyna aıtylǵan sóz dep bilemiz. Sondyqtan Súıinbaı qazaqtyń ǵana emes, túrki jurtshylyǵynyń da uly aqyny», - degen keleli pikirin jetkizdi.
Osy kúni toıǵa arnaıy kelgen Kochnýrın mýnısıpalıtetiniń Halyqaralyq qatynas departamentiniń dırektory Mustafa Arach Súıinbaı mereıtoıyn bıylǵy jyly túrkıalyqtar bastap, aqynnyń qurmetine saıabaq ashqanyn atap ótip, anadolylyqtardyń toıǵa degen tartýyn usyndy. Aqyn murajaıyna qoıylǵan bul syılyqtardyń qataryn Jambyl jáne Ońtústik Qazaqstan oblystarynyń da tartý-taralǵylary tolyqtyrdy.
Aqyndar men termeshiler Súıinbaıdyń jyr-termelerin tógiltip, «Súıinbaı sazy» ansambli ónerin pash etti.
Mereıtoı sońy «Kókbastaý» ıpodromynda ulttyq at sporty jarystaryna ulasty.
Jalpy, aqyn mereıtoıy qarsańynda aqynnyń buryn baspa betin jaryq kórmegen shyǵarmalary muraǵat arqyly jınaqtalyp, sonymen qatar Súıinbaı týraly jazǵan aqyn-jazýshylardyń shyǵarmalary iriktelip, 4 tomdyq kitap bolyp basylyp shyqty.
Jyr súleıiniń kesenesi qaıta qalpyna keltirilip, ádebı-memorıaldyq murajaıyna kúrdeli jóndeý júrgizildi. Týǵan aýyly Qaraqystaq abattandyrylyp, jańa keıipke endi.
Derekkóz: QazAqparat
