TARAZ. QazAqparat - Ótken baspasóz týry barysynda jýrnalıserge Shý aýdanyndaǵy «Taraz» hımıalyq parki» AEA arnaıy ekonomıkalyq aımaq ınfraqurylymynyń nysandary tanystyryldy.
Eske salsaq, óńirde hımıalyq salany joǵary basymdyqpen damytýǵa baılanysty 2012 jyly 2037 jylǵa deıingi merzimde Qazaqstanda toǵyzynshy sanalatyn «Taraz» hımıalyq parki» AEA qurý týraly jarlyǵyna QR Prezıdenti qol qoıdy.
Jambyl óńiriniń aýqymdy mıneraldyq resýrstary (qazastandyq fasforıtti barlyq qorynyń 90 paıyzy jáne kvarsıttiń 65 paıyzy), joǵary tranzıttik áleýet, hımıalyq ónerkásiptiń tarıhı qalyptasqan qurylymy, bilikti mamandary bar.
Búginde jambyldyq hımıalyq klaster «Qazfosfat», «EvroHım-Ýdobrenıa» jáne «Taraz» hımıalyq parki» AEA kompanıalaryn biriktiredi, onyń birinshi qatysýshysy «Birikken hımıalyq kompanıa» JSHS, 2012 jyly «Jurong» (Sıngapýr) kompanıasymen Qazaqstanda hımıalyq tehnoparkterdi basqarý jónindegi yntymaqtastyq týraly kelisimge qol qoıdy. 2014 jyly «QADAM Industries» («Pestısıdter men basqa da agrohımıalyq ónimder óndirisi») JSHS jáne «Qyzylorda munaı gaz» («Metanol óndirisi») JSHS qatysýshysy retinde tirkeldi.
Shý aýdanynda 505 ga alańdy alyp jatqan AEA álemdik standarttarǵa sáıkes keletin báekelestigi joǵary hımıalyq ónimdi óndirýge múmkindik beretin tıimdiligi joǵary ınovasıany qoldanýǵa baǵyttalǵan. Bul ósimdikterdi qorǵaý quraldary, kúıdirgish soda, jemshóp fosfaty, plasıkalyq qubyr, shyny ydys jáne t.b. óndirisi. AEA ınvestısıasyn aldyn ala baǵalaý 24,5 mlrd teńgeni quraıdy. Jyl saıyn 75 mlrd teńgege ónim shyǵarylady dep kútilýde.
«Taraz» hımıalyq parki» AEA qurýdyń birinshi kezeńi aıaqtalýda. Infraqurylym nysandaryn jobalaý jáne salýdy «KATEK» JSHS, «Kaz Hi Tech Euro Building» JSHS, «ISS Engineering» JSHS jáne «Órken» JSHS jobalaý-zertteý kompanıalarynan konsorsıým júzege asyrady.
AEA qatysýshylary úshin 25 jylǵa salyqtan bosatý túrinde jeńildikter kózdelgen. Munda AEA qurý kezinde tolyqtaı tutynatyn taýarlardy satý kezinde, QR Úkimeti aıqyndaǵan taýarlar tizbesi boıynsha nóldik stavkamen qosymsha qunǵa salyq salynady. Eksport pen ımport kezinde AEA qatysýshylary keden bajdarynan bosatylady.
Búginde AEA aýmaǵynda syrtqy ınfraqurylym nysandary boıynsha qurylys-montajdaý jumystary oryndaldy. Negizgi kózi KEGOS» PS-500 AQ qosalqy stanasasy, sondaı-aq «S» qurylys tizbegi boıynsha Azıalyq gaz qubyrynan gazmen jabdyqtaý bolatyn syrtqy elektrmen jabdyqtaý júıesi 10 paıyzǵa daıyn.
100 tonnaǵa deıin júk kóteretin kólik júre alatyn asfált jamylǵysymen kireberis joldy shymkenttik «Kaz Hi Tech Euro Building» kompanıasy tóseýde. Ol 98 paıyzǵa daıyn. Uzyndyǵy 6,4 shaqyrym kireberis temir joldy «ISS Engineering» JSHS salýda, ol 92 paıyzǵa daıyn.
2015 jyldyń sońyna deıin AEA aýmaǵynda Tasótkel sý qoımasynan magıstraldyq sý qubyryn tartýdy jáne sorǵy stansasyn salý jumystaryn aıaqtaý josparlanýda. Qazir jalpy uzyndyǵy 70 shaqyrym bolatyn sý tartý qubyrynyń 50 shaqyrymy tartyldy. Uzyndyǵy 7,7 shaqyrym kanalızasıalyq júıe ruqsat etilgen normaǵa deıin paıdalanylǵan tehnıkalyq sýdy tazalaýdy kózdeıdi.
İshki ınfraqurylymda BÓP jáne ákimshilik korpýsy salynýda. Sondaı-aq júk resimdeý pýnkti, garaj, órt sóndirý deposy jáne basqa da ınfraqurylym nysandaryn salý josparlanýda.
Jambyl oblysy ákiminiń baspasóz qyzmetinde habarlaǵandaı, «Taraz» hımıalyq parki» AEA ınfraqurylymdyq nysandaryn salý kezekpen iske asyrylady. AEA alǵashqy qatysýshylarynyń ómirsheńdigin qoldaý úshin ınfraqurylymnyń negizgi nysandary birinshi kezekte salynady. 16 jobanyń jobalyq qýatyna shyǵý 2023 jylǵa josparlanǵan. AEA jobasy 2,4 myń jumys ornyn ashady dep kútilýde. Bul óńirdiń áleýmettik-ekonomıkalyq damýyna oń yqpal etedi.
Derekkóz: QazAqparat
