ORAL. QazAqparat - 23 qazan kúni Batys Qazaqstan oblystyq qazaq drama teatrynyń jańa maýsymy belgili jazýshy-dramatýrg Rahymjan Otarbaevtyń shyǵarmasy boıynsha qoıylǵan «Jáńgir han» spektakliniń premerasymen ashyldy.
Qazaq handyǵynyń 550 jyldyǵyna arnalǵan týyndyny teatrdyń bas rejıseri Muqanǵalı Tomanov qoısa, sýretshi Murat Mámbetov te biraz eńbek sińirgen. Jáńgir handy Qazaqstannyń eńbek sińirgen qaıratkeri Erbol Esendosov beınelese, Mahambetti sahnaǵa teatrdyń dırektory Qýanysh Amandyqov alyp shyqty. Fatımany Janargúl Qurmanǵalıeva somdasa, sondaı-aq QR eńbek sińirgen ártisi, Memlekettik syılyqtyń ıegeri Serdesh Qajymuratov (ımperator), Qazaqstannyń eńbek sińirgen qaıratkeri Bıbigúl Isalıeva (ımperatrısa), mádenıet salasynyń úzdigi Musaǵalı Bektenov (Qaraýyl qoja) syndy teatrdyń beldi ártisteri óz rolderin barynsha nanymdy shyǵardy.
Spektákldiń ón boıynan qazaq dalasyn otarlaýshylyqtyń salqyny sezilip turady. Isataıdyń ólimi týraly habardy estigen Jáńgir han kúızelisi onyń ózi ashqan mekteptiń alǵashqy shákirtterin Orynborǵa jibergendegi qýanyshty kóńil-kúıimen aýysady. Endi birde Kovalevskııdiń kerýenin tonaǵandy syltaý etip, Mahambetti tappaq bolǵan kazak áskeriniń qanquıly áreketi ózderiniń ólimimen aıaqtalady. Mahambet pen Jáńgir hannyń sózben teketiresi kezinde bir-biriniń harakteri ashyla túsedi. «Bulaı aıtpasa, Mahambet bola ma, onyń sózin kótermesem, men han bolam ba?» degen han Mahambetke Jaıyqtyń arǵy betine ótip ketý úshin qaıyq usynady. Biraq batyr ıilmeıdi. Eki ottyń ortasynda qalǵan Jáńgir hannyń aq patshanyń Ordada shirkeý salý týraly talabyna kóngisi kelmeýi, basqa da áreketteri onyń babasy Ábilqaıyr han kezinde bastalǵan bodandyq qamytynan qutyla almaı, ah urýynyń astaryn ashyp kórsetedi. Jalpy, qoıylymda basy artyq oqıǵa joq, tyń rejıserlik sheshimderi bar.
Aıta keteıik, Batys Qazaqstan oblystyq qazaq drama teatry bıyl Kerch qalasynda ótken «Bosporskıe agony» atty halyqaralyq antıkalyq óner festıvaliniń bas júldesin jeńip alǵany belgili. Sondaı-aq, Óskemen qalasynda HHİİİ respýblıkalyq teatrlar festıvalinde Uly Jeńis taqyrybyna arnalǵan shyǵarmalar boıynsha bas júldeni ıelendi. Oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynovtyń málim etkenindeı, batysqazaqstandyq teatr aldaǵy aptada Atyraý qalasynda ótetin taǵy bir halyqaralyq festıválge qatysqaly otyr.
Derekkóz: Qazaqparat
