Qazaqstan Respýblıkasy Parlamenti Májilisiniń Zańnama jáne sot-quqyqtyq reforma komıtetiniń múshesi depýtat Abzal Quspan Talǵarda bolǵan qaıǵyly oqıǵaǵa qatysty pikir bildirdi. 

«Sońǵy kúnderi Talǵardaǵy Sherzat Polattyń ólimine qatysty qoǵamda qyzý talqylaý júrip jatqany belgili. Áleýmettik jelilerde ártúrli aqparattardyń taralýyna baılanysty, kóp jaǵdaıda tekserilmegen, emosıaǵa toly jazbalar men beıneúndeýlerge nazar aýdarylýda. Osyǵan baılanysty áriptesim, depýtat, zań ǵylymdarynyń doktory Únzıla Shapaqpen birge oryn alǵan oqıǵanyń mán-jaıymen jete tanysý úshin arnaıy Almaty oblysyna bardyq. İstiń barysyn zerdeleý maqsatynda Almaty oblysy prokýrory Berik Abyzbaıulymen, Oblystyń Polısıa departamentiniń basshysy Meıram Jumkenulymen jolyqtyq. Men, zańger retinde, bul aýyr jaǵdaılardy quqyqtyq turǵyda qarastyrýdyń mańyzdylyǵyn atap ótkim keledi. Mundaı isterde qoǵam tarapynan jasalǵan qysym tergeý amaldarynyń obektıvti ári jan-jaqty júrgizilýine keri áserin tıgizýi múmkin», — dedi halyq qalaýlysy.

Prokýratýranyń resmı aqparatyna sáıkes, qasaqana kisi óltirý kúdigimen 11 adam adam ustalǵan. Qazirgi tańda tıisti tergeý amaldary júrgizilýde.

«Osy is boıynsha 170 astam kýágerlerden jaýap alynyp, 40 jýyq saraptama taǵaıyndalyp, jan-jaqty tergelip jatyr. Sonymen qatar, Sherzat Polattyń aǵasy N. Ǵaıypbaevtyń ólimi de Bas prokýratýra men İshki ister mınıstrliginiń baqylaýynda ekenin atap ótken jón. Ol boıynsha sot-medısınalyq saraptamalar júrgizilýde. Qylmystyq istiń qoǵamdyq mańyzdylyǵyna baılanysty, men tergeý barysymen tanysyp, zańger retinde mán-jaıdy naqty anyqtaý úshin jumys istep jatyrmyn. Bul istiń ádil ári ashyq qaralýyna yqpal etý – basty maqsatymyz. Alǵashqy nátıjelerge kelsek, oblys prokýrory Berik Abyzbaıulymen kezdesý barysynda tergeý amaldarynyń barynsha zań aıasynda jáne tıanaqty júrgizilýin talqyladyq. Oblystyq prokýratýra bul istiń quqyqtyq jáne ádildik prınsıpterine saı qaralatynyn málimdep, bizge ýáde berdi», — dedi Abzal Quspan.

Sondaı-aq ol aldaǵy ýaqytta tergeý barysy men resmı aqparattar týraly qoǵammen únemi bólisip otyratynyn aıtty. Budan bólek kez kelgen rastalmaǵan aqparattan aýlaq bolýǵa jáne resmı derekkózderge súıenýge shaqyrdy.