Fransıanyń burynǵy prezıdenti ózine qarsy sot prosesine yqpal etý maqsatynda aǵa sýdıamen sybaılas jemqorlyq jasaǵany úshin kináli dep tanyldy.

Parıj kasasıalyq soty Fransıanyń burynǵy prezıdenti 69 jastaǵy Nıkolá Sarkozıge qatysty apelásıalyq sottyń sheshimin kúshinde qaldyrdy. Sybaılas jemqorlyq, tergeýge yqpal etý jáne qysym kórsetý boıynsha úsh jyl bas bostandyǵynan aıyryldy. Ol eks-prezıdent bolsa da, jazasyn túrmede arnaıy bilezik taǵyp óteıdi.

Eks-prezıdent advokaty Terrı Gersogpen birge aqparat alý jáne basqa iske yqpal etý maqsatynda 2014 jyly Bettankýr isinde kasasıalyq sottyń aǵa sýdıasy Gılbert Azıbertpen "sybaılas jemqorlyq týraly kelisim" jasasqany úshin kináli dep tanyldy. 

Sarkozı Azıbertke kómektesken jaǵdaıda Monakoda laýazymy ósetinin aıtqan. Gersog Sarkozı men Azıbert arasyndaǵy deldal rólin atqardy.

Úsheýi de úsh jylǵa bas bostandyǵynan aıyryldy, sonymen qatar úsh jylǵa burynǵy qyzmetimen aınalysýǵa tyıym salyndy. Sarkozı úsh jyl saılaýǵa túse almaıdy.

Nıkolá Sarkozıge qarsy sot 2020 jyldyń qarashasynda ol laýazymyn paıdalanyp, iske áser etpek boldy dep bastaldy. L'Oreal kosmetıkalyq kompanıasynyń teń ıesi, mıllıarder Lılıan Bettankýrdyń qaıyrymdylyqqa qatysty tergeýi bolǵan eken. Ol sol aqshany 2007 jylǵy saılaý naýqanyna paıdalanǵysy kelgen deıdi.