ASTANA. QazAqparat - Jambyl oblysynyń ákimi Kárim Kókirekbaev bastaǵan delegasıa Belarýs Respýblıkasynyń Grodnenskaıa oblysyna issaparmen baryp qaıtty.
Quramynda aýdan ákimderi, joǵary oqý ornynyń, saýda-sattyq mekemeleriniń, sharýa qojalyqtarynyń basshylary bar delegasıany Grodno qalasynda Grodnenskaıa oblysynyń gýbernatory Vladımır Kravsov qarsy aldy. Bul týraly oblys ákimdiginiń baspasóz qyzmetinen habarlady.
İssapardyń alǵashqy kúninde jambyldyq top «Lıdselmash» AAQ, «Lıdagroprommash» AAQ, «Progres-Vertılıshkı» ÁKK-ynda bolyp, olardyń jumysymen jan-jaqty tanysty.
Kezdesý barysynda oblys ákimi Kárim Kókirekbaev:
«Men Belarýs eline ekinshi ret, al Grodnenskaıa oblysyna birinshi ret taban tirep turmyn. Eldiń, sonyń ishinde osy óńirdiń ónerkásibi ǵana emes, áleýmettik damýy meni tańǵaldyrdy. Eki tarap úshin de iskerlik baılanys ornatyp, ekonomıkalyq, bilim, mádenıet jáne týrızm salalary boıynsha qarym-qatynasty nyǵaıtý tıimdi dep esepteımin», - dedi Kárim Kókirekbaev. Sonymen qatar, oblys basshysy óz sózinde kórshiles eldiń oblys, aýdan basshylarymen til tabysý jeńil ekendigin aıta kele, Belorýssıadaǵy halyq sany oblysymyzben shamalas óńirlermen týystas bolýǵa nıetti ekendigin jetkizdi. Óz kezeginde Vladımır Kravsov áriptesine qoldaý bildirip, syrtqy ekonomıkalyq vedomstvoǵa tıisti qujattardy daıyndaýdy tapsyrdy.
Kezdesý barysynda Grodnen gýbernatory men oblys ákimi qurastyrmaly óndirispen aınalysatyn «Lıdselmash» holdıńiniń fılıalyn qurýǵa aldyn ala kelisim jasady. Munymen qosa, grodnenskilik aýylsharýashylyǵy tehnıkalarynyń kórme pavılonyn, aıaq kıim fabrıkasynyń fılıalyn qurý, grodnendik óndirýshilerdiń jıhazdaryn Jambyl jerine jetkizý máselesi boıynsha da pikir almasty.
Aımaq basshylary ekonomıkalyq áriptestik jaıyn ǵana qozǵap qoımaı, mobıldik bilim berý, mádenı, áleýmettik baılanys jaıyn da talqylandy.
«Biz mamandarmen tájirıbe almasyp, aýyl sharýashylyǵy ónerkásibi boıynsha ǵana emes, mádenı baılanystardy da nyǵaıtýymyz kerek. Sonymen birge, ishki jáne syrtqy týrızmdi damytýǵa da nıettimiz. Bizdiń oblysymyz arqyly Uly Jibek joly ótken. Bizde eki myńnan astam kóne tarıhı eskertkishter bar. Sizderdiń de tarıhtaryńyz baı. Meniń oıymsha, biz osy salada da myqty baılanys ornata alamyz. Mádenı baılanystardy da qarqyndy damytýǵa múmkindik zor», - dedi de Kárim Kókirekbaev 2016 jyly Grodnodaǵy Jambyl oblysynyń mádenı kúnderin, onan soń Grodnenskaıa oblysynyń Tarazdaǵy mádenı kúnderin ótkizýdi usyndy. Al Vladımır Kravsov óz kezeginde áriptesin keler jyldyń maýsym aıynda Grodnoda ótetin respýblıkalyq ulttyq mádenı is-sharaǵa qatysýǵa shaqyrdy.
Qos tarap ta munymen qosa, avıatasymal máselesin damytýǵa qyzyǵýshylyq tanytty. Kárim Násbekuly Tarazdan Grodno qalasyna nemese Mınskke tikeleı ushý baǵytyn uıymdastyrý jaǵyna kóńil bóletinin aıtty. Belarýstardyń shıpajaılaryn qazaqstandyq týrıserdiń paıdalanýyna múmkindik týǵyzý jaǵy da umyt qalmady. Oblys ákimi tynyǵý, saýyqtyrý qyzmetterin kórsetý úshin tikeleı kelisimsharttarǵa qol qoıýǵa daıyn ekendigin bildirdi.
Derekkóz: Qazaqparat
