ÓSKEMEN. QazAqparat - QR Úkimeti apparatynyń qaraýyna KIA Soul EV alǵashqy qazaqstandyq elektrokary kelip jetti.
«AZIA AVTO» kólik qurastyrý zaýyty usynǵan avtomobıl bir aı boıy Mınıstrler kabınetiniń qyzmettik parkinde jol synaǵynan ótetin bolady. Otandyq kólik ónerkásibinde elektr kúshimen júretin alǵashqy model - Óskemende jınalǵan KIA Soul EV mıkroveni boldy, dep habarlady «AZIA AVTO» kompanıasynan.
Qazaqstandyq kólik ónerkásibi tarıhyndaǵy birinshi elektromobıldiń ilki partıasy «AZIA Avto» zaýytynyń konveıirinen 2014 jyldyń jeltoqsanynda túsken. Aıta keteıik, KIA Motors kompanıasy Soul EV mıkrovenin 2014 jyly Chıkago kólik salonynda usynǵan, al bıylǵy jyly bul model Norvegıa, Koreıa, Germanıa, AQSH jáne taǵy basqa kóptegen elder naryqtaryndaǵy elektrokarlar segmentinde úlken suranysqa ıe boldy.
Avtomobıl 200 shaqyrymǵa deıin júrý qoryn saqtap otyratyn syıymdylyǵy saǵatyna 27 kVt lıtıı-ıondyq polımerli batareıasymen jabdyqtalǵan. Soul EV-niń elektr qozǵaltqyshynyń 110 lıtrlik qýattylyǵy saǵatyna 145 shaqyrym maksımaldyq jyldamdyqty qamtamasyz etedi. Bul modelde ornatylǵan jylýdy retteý júıesiniń arqasynda ony kez kelgen temperatýralyq rejımde paıdalanýǵa bolady.
2015 jyldyń qańtar-aqpan aılarynda Óskemende qurastyrylǵan KIA Soul EV elektromobılderi Shyǵys Qazaqstan kúre joldarynda mınýs 25 gradýsqa deıingi temperatýrada uzaq qysqy synaqtardan tabysty ótti.
«Búginde respýblıkanyń joldarynda tek 200 elektromobıl paıdalanylýda. Bul san sımvolıkalyq. Biraq bárinen buryn bir jyldyń ishinde Qazaqstandaǵy ekologıalyq kólik parki eki eselendi. Bizde shyǵarylǵan KIA Soul EV kóligin úıdegi rozetka arqyly zarádtaýǵa bolady. Olaı bolǵanymen, respýblıkada ekokóliktiń odan ári taralýyna oǵan quıatyn ınfraqurylymnyń joqtyǵy kedergi bolyp otyr. Energıanyń taza kózderine arnalǵan EKSPO-2017 kórmesiniń ıesi retinde Qazaqstan «jasyl» kólikti paıdalaný úshin jaǵdaılar jasaıtyny sózsiz. Infraqurylymnyń damýymen birge biz avtomobılderdiń serıalyq óndirisin de talqylaı alamyz. Bul baǵytta alǵashqy qadamdar jasadyq», - deıdi «AZIA AVTO» AQ-nyń prezıdenti Erik Saǵymbaev.
Derekóz: Qazaqparat
